اسلام آباد : بینظیر انکم سپورٹ پروگرام میں رجسٹرڈ صارفین کے لئے بڑی خوشخبری آگئی، اب رقم براہ راست نکلوا سکیں گے۔
تفصیلات کے مطابق بینظیر انکم سپورٹ پروگرام ( بی آئی ایس پی) فرنچائز سسٹم میں بڑے پیمانے پر کرپشن کا انکشاف ہوا، جس کے بعد بی آئی ایس پی کا فرنچائز سسٹم ختم کرنے کا فیصلہ کرلیا گیا۔
ذرائع نے بتایا کہ بی آئی ایس پی میں فرنچائز سسٹم خاتمے کا فیصلہ کرپشن شکایات پر ہوا ہے، بی آئی ایس پی کے وظائف تقسیم کیلئے چھ بینکوں سے معاہدے طے پا گئے۔
View this post on Instagram
ذرائع کا کہنا تھا کہ بی آئی ایس پی وظائف کی تقسیم ایزی پیسہ، جاز کیش سے ہو گی اور بی آئی ایس پی کارڈ ہولڈر کا وظیفہ بینک اکاونٹ میں ٹرانسفر ہوگا۔
ذرائع نے کہا کہ چیئرپرسن بی آئی ایس پی نے فرنچائز سنٹرز کے خفیہ دورے کئے تھے، روبینہ خالد نے فرنچائز سنٹرز پر خواتین کو درپیش مسائل کا جائزہ لیا تھا، فرنچائز سنٹرز پر خواتین نے روبینہ خالد سے کرپشن کی شکایات کی تھیں۔
ذرائع کے مطابق بی آئی ایس پی کے تمام پروگراموں کے صارفین کو ادائیگیاں براہ راست ہونگی، صارفین ایزی پیسہ، جاز کیش سے رقم براہ راست نکلوا سکیں گے، رقوم کی براہ راست منتقلی سے کرپشن کا خاتمہ ہو گا۔
