کوئٹہ: فاطمہ جناح اسپتال میں کانگو وائرس میں مبتلا مریض دم توڑ گیا۔
اسپتال ذرائع کے مطابق کوئٹہ سے تعلق رکھنے والے 16 سال کے مریض کو گزشتہ روز تشویش ناک حالت میں لایا گیا تھا، جہاں انھیں طبی امداد دی گئی مگر وہ جاں بر نہ ہو سکا۔
مریض میں کانگو وائرس کی تصدیق کی گئی تھی، جس کی موت کے بعد صوبہ بلوچستان میں رواں سال کانگو وائرس سے اموات کی تعداد 9 ہو گئی ہے، جب کہ رواں سال صوبے میں کانگو وائرس کے 34 کیسز رپورٹ ہو چکے ہیں۔
واضح رہے کہ کانگو وائرس کیسز میں تیزی سے اضافے کے باعث گزشتہ برس نومبر میں ایمرجنسی نافذ کی گئی تھی، جس میں مذبح خانوں کے علاوہ کھلے مقامات پر جانوروں کے ذبح کرنے پر پابندی لگائی گئی تھی، اور مویشی منڈیوں میں اسپرے اور دیگر حفاظتی انتظامات کا فیصلہ کیا گیا تھا، ہیلتھ ایمرجنسی کے باوجود رواں سال بھی کانگو وائرس کیسز میں تیزی سے اضافہ اور اموات کا سلسلہ جاری ہے۔
پاکستان میں منکی پاکس کا چھٹا کیس سامنے آگیا
یاد رہے کہ ہفتہ 14 ستمبر کو بھی فاطمہ جناح اسپتال میں زیر علاج کانگو وائرس کی مریضہ دم توڑ گئی تھی، محکمہ صحت کا کہنا تھا کہ اس دن 24 گھنٹوں کے دوران کانگو وائرس سے 2 مریضوں نے دم توڑا تھا۔
کانگو سے دم توڑنے والی مریضہ کا تعلق کوئٹہ کے علاقے کلی کمالو سے تھا، جب کہ اس سے قبل آئسولیشن وارڈ میں دم توڑنے والی 40 سالہ خاتون کا تعلق موسیٰ خیل سے تھا۔
