وزیراعظم پاکستان شہباز شریف اور صدر آصف علی زرداری ن برادر ملک سعودی عرب کے قومی پر خصوصی پیغام دیا اور محمد بن سلمان کو مبارکباد دی ہے۔
شہباز شریف نے سعودی عرب کے قومی دن سے متعلق خصوصی ویڈیو پیغام جاری کیا، وزیراعظم نے کہا کہ قومی دن پر شاہ سلمان بن عبدالعزیز اور ولی عہد محمد بن سلمان کو مبارکباد دیتا ہوں، سعودی عوام کو بھی 94ویں قومی دن پر مبارکباد پیش کرتا ہوں۔
انھوں نے کہا کہ ترقی اور خوشحالی کے لیے سعودی قیادت کا وژن مثالی ہے، معاشی ترقی اور کاروباری سرگرمیوں میں اضافے کیلئےسعودی عرب کے اقدامات قابل تقلید ہیں،
سعودی عرب، امن، خوشحالی، استحکام اور بین المذاہب ہم آہنگی کا اہم وکیل ہے، پاکستان اور سعودی عرب نے ہرمشکل وقت میں ایک دوسرے کی مدد کی، سعودی عرب کے ساتھ مضبوط دوستی کے عزم کا اعادہ کرتے ہیں۔
صدر مملکت نے سعودی عرب کے قومی دن کی مناسبت سے تقریب سے خطاب کیا، انھوں نے کہا کہ سعودی فرمانروا شاہ سلمان، ولی عہد محمد بن سلمان اور عوام کو قومی دن کی مبارکباد دیتا ہوں۔
آصف زرداری نے کہا کہ دونوں ملکوں کے درمیان مشترکہ مذہبی اور تاریخی اقدار ہیں، پاکستان اور سعودی عرب کے درمیان مختلف شعبوں میں مثالی تعلقات ہیں، یقین ہے کہ معیشت اور دفاع سمیت مختلف شعبوں میں تعلقات مزید مستحکم ہوں گے۔
انھوں نے کہا کہ دونوں ملک ہر مشکل میں ایک دوسرے کے شانہ بشانہ رہے ہیں، باہمی مفاد کے مختلف شعبوں میں تعاون کو مزید وسعت دینے کیلئے پُرعزم ہیں۔
صدر آصف زرداری نے کہا کہ سعودی عرب میں جدت اور خوشحالی کیلئے ولی عہد محمد بن سلمان کے اقدامات قابل تعریف ہیں، تجارت، کاروبار اور سرمایہ کاری کے شعبوں میں تعاون مزید بڑھائیں گے۔
دریں اثنا سعودی عرب کے 94ویں قومی دن کی مناسبت سے ہونے والی تقریب میں صدر آصف زرداری، کابینہ ارکان اور ارکان پارلیمنٹ نے شرکت کی۔
