لبنان کی مزاحمتی تحریک حزب اللہ کی جانب سے اپنے کمانڈر ’علی کرکی‘کی خیریت سے متعلق تفصیلی بیان جاری کیا گیا ہے، اسرائیلی فوج کا دعویٰ جھوٹا ثابت ہوا۔
غیر ملکی ذرائع ابلاغ کے مطابق اسرائیل کی جانب سے بیروت میں فضائی حملے میں علی کرکی کی شہادت کا دعویٰ کیا گیا تھا، جس کے بعد اب حزب اللہ کی جانب سے اہم بیان جاری کردیا گیا ہے۔
حزب اللہ کے مطابق اس کے سینئر رہنما علی کرکی خیریت سے ہیں، اسرائیلی حملے میں حزب اللّٰہ جنوبی فرنٹ کے کمانڈر علی کرکی محفوظ رہے۔
واضح رہے کہ لبنان پر اسرائیلی حملے شدت اختیار کرچکے ہیں، جنوبی اور مشرقی لبنان میں اسرائیلی طیاروں نے 800 سے زیادہ حملوں میں رہائشی علاقوں کو نشانہ بنایا، اس دوران بربریت کی انتہاء دیکھنے کو ملی کہ زخمیوں کو لے جانے والی ایمبولنسوں کو بھی نہ بخشا گیا۔
اسرائیلی دھمکی کے بعد وادی بقاع اور دیگر رہائشی علاقوں سے نقل مکانی شروع ہوگئی ہے، ہزاروں افراد نے محفوظ علاقوں کی طرف انخلا شروع کردیا ہے، جبکہ لبنان میں تعلیمی اداروں کو دو روز کے لئے بند کردیا گیا ہے۔
حزب اللہ کی جانب سے بھی اسرائیل پر جوابی راکٹ اور میزائل فائر کئے گئے، تل ابیب کی جانب میزائل داغے، شمالی علاقے کی اسرائیلی فوجی چوکیوں، حیفہ شہر میں رافیل ڈیفنس انڈسٹری کمپلیکس کو نشانہ بنایا۔
اسرائیلی فوج کی لبنان میں خون کی ہولی، 492 شہید
اسرائیل نے پورے ملک میں مخصوص ہنگامی حالت نافذ کردی، حیفہ میں تعلیمی سرگرمیوں کو معطل کردیا گیا ہے۔
