نیویارک. وزیراعظم شہباز شریف نے ترکیہ کے صدر رجب طیب اردوان سے ملاقات میں فلسطین سے متعلق ان کی تقریر کی تعریف کرتے ہوئے دورہ پاکستان کی دعوت دی۔
تفصیلات کے مطابق وزیراعظم شہباز شریف کی ترک صدر رجب طیب اردوان سے نیویارک میں اقوام متحدہ جنرل اسمبلی کے 79ویں اجلاس کے موقع پر ملاقات ہوئی۔
دونوں رہنماؤں کا دوطرفہ امور پر تبادلہ خیال ہوا اور تجارت، سرمایہ کاری، دفاع و سلامتی کے شعبوں میں باہمی طور پر مفید تعاون کو مزید مضبوط بنانے پر اتفاق کیا۔
انہوں نے مستقبل قریب میں اسلام آباد میں منعقد ہونے والے پاکستان-ترکیہ اعلیٰ سطحی سٹریٹجک کوآپریشن کونسل (HLSCC) کے آئندہ 7ویں اجلاس کی تیاریوں کا جائزہ لیا۔
دونوں رہنماؤں نے علاقائی اور عالمی امور بالخصوص غزہ میں جاری نسل کشی اور سنگین انسانی صورتحال پر بھی تبادلہ خیال کیا۔
انہوں نے غزہ میں فوری طور پر انسانی بنیادوں پر جنگ بندی اور گشیدگی کے خاتمے کا مطالبہ کیا، وزیر اعظم نے غیر قانونی طور پر بھارت کے زیر تسلط جموں و کشمیر (IIOJK) کے مظلوم عوام کے لیے ترکیہ کی مضبوط اور مستقل حمایت کو سراہا۔
ملاقات کے دوران صدر اردوان نے وزیر اعظم کی معاشی پالیسیوں کی تعریف کی وزیر اعظم کی قیادت اور اقتصادی اصلاحات کے عزم کو سراہا، مزید برآں صدر ایردوان نے وزیراعظم کو سالگرہ کی مبارکباد بھی دی۔
ملاقات کے بعد وزیر اعظم شہباز شریف نے میڈیا سے گفتگو میں کہا ترکیہ سے ہمارے برادرانہ تعلقات ہیں، ترکی کے صدر طیب ادوان کےساتھ ملاقات سودمند رہی ہے۔
ترکیہ کے صدر کی اقوام متحدہ میں تقریرقابل تعریف تھی، ان کی اقوام متحدہ میں فلسطین پرتقریردلوں کوچھولینےوالی تھی،
وزیراعظم نے ترک صدر کو دورہ پاکستان کی دعوت کی۔ جس پر انھوں نے جلد پاکستان کا دورہ کرنے کی یقین دہانی کرائی۔
اس سے قبل وزیراعظم کی مالدیپ کے صدر سے ملاقات ہوئی تھی ، ملاقات اقوام متحدہ کی جنرل اسمبلی کے 79 ویں اجلاس کےموقع پر ہوئی، دونوں رہنماؤں نے پاکستان اورمالدیپ کےدیرینہ اورگہرے تعلقات کےفروغ پرزوردیا۔
وزیراعظم نے مختلف شعبوں میں تعاون بڑھانےکےعزم کا اعادہ کیا، ملاقات میں تجارت،سیاحت، تعلیم،سرمایہ کاری پربات ہوئی اور موسمیاتی تبدیلی میں تعاون بڑھانے کاعزم کیاگیا۔
دونوں رہنماؤں نے خطےکےامن،خوشحالی اوراستحکام کیلئےملکرکام کرنےپراتفاق کیا۔
