تل ابیب: اسرائیلی اخبار یروشلم پوسٹ نے دعویٰ کیا ہے کہ حماس رہنما یحیٰی سنوار زندہ ہیں، اور انھوں نے خفیہ طور پر قطر سے رابطہ قائم کیا ہے۔
تفصیلات کے مطابق چند دن پہلے اسرائیل نے غزہ کے اسکول پر حملے میں یحیٰی سنوار کو نشانہ بنانے کا دعویٰ کیا تھا۔ تاہم اب پیر کو اسرائیلی میڈیا نے العربیہ اور ڈیلی میل سمیت مختلف ذرائع کا حوالہ دیتے ہوئے رپورٹ کیا ہے کہ حماس کے رہنما یحییٰ سنور زندہ ہیں اور انھوں نے قطری ثالثوں کے ساتھ دوبارہ رابطہ کیا ہے۔
قطر کے ایک سینئر سفارت کار نے یروشلم پوسٹ کو بتایا کہ براہ راست رابطے کی خبریں غلط ہیں، تمام مذاکراتی کوششیں حماس کے سینئر سیاسی شخصیت خلیل الحیا کے ذریعے کی گئی ہیں۔
سفارت کار نے یہ بھی واضح کیا کہ ثالثی کی تمام کوششیں دوحہ میں حماس کے سیاسی دفتر کے نمائندوں کے ذریعے کی جاتی ہیں۔ واضح رہے کہ یحییٰ سنوار کے بارے میں پہلے بھی قیاس آرائیاں کی گئی تھیں کہ انھیں ماردیا گیا ہے، اسی لیے سرکاری چینلز سے رابطہ قائم نہیں کر رہے ہیں۔
جنگ بندی کے معاہدے کے لیے ہونے والی بات چیت سے واقف ذرائع نے یہ بھی دعویٰ کیا تھا کہ یحییٰ سنوار کو چوں کہ یقین تھا کہ اسرائیل کسی معاہدے تک پہنچنے میں دل چسپی نہیں رکھتا، اس لیے انھوں نے خود کو بات چیت ہی سے دور رکھا۔
اسرائیل کا حزب اللہ کمانڈر سُہیل حسین حسینی کو شہید کرنے کا دعویٰ
واضح رہے کہ خلیل الحیا حماس کی ایک سینئر سیاسی شخصیت ہیں، وہ تنظیم کی سفارتی کوششوں میں ہمیشہ سرگرم رہے، اور جنگ بندی سمیت دیگر مذاکرات میں ہمیشہ انھوں نے حماس کی نمائندگی کی، قطری سفارت کار کے مطابق یہ الحیا ہی تھے جنھوں نے یرغمالیوں کے مسئلے پر بیرونی ثالثوں کے ساتھ بات چیت کی قیادت کی۔
