کراچی: انسداد دہشت گردی عدالت میں ایئرپورٹ کے قریب خودکش بم دھماکے کیس میں اہم پیش رفت ہوئی ہے، یہ خودکش دھماکا پاکستان اور چین کے تعلقات خراب کرنے کی سازش قرار دے دیا گیا، سی ٹی ڈی نے ابتدائی اطلاعی رپورٹ عدالت میں پیش کر دی۔
رپورٹ کے مطابق خودکش دھماکے میں بلوچستان لبریشن آرمی کو ملوث قرار دے دیا گیا، دہشت گردوں نے ملک دشمن غیر ملکی خفیہ ایجنسی کی مدد سے دھماکا کیا، نامعلوم دہشت گرد نے اپنی گاڑی کو چینی باشندوں کی کانوائے کی گاڑیوں کے قریب لا کر بلاسٹ کیا۔
خودکش دھماکا آؤٹر ٹرمینل جناح انٹرنیشنل ٹرمینل کے قریب سی اے اے گارڈ روم کے سامنے ہوا، پولیس دھماکے کی آواز سن کر موقع پر پہنچی، اور دیکھا کہ پولیس، رینجرز و دیگر افراد زخمی حالت میں موجود تھے۔
رپورٹ میں کہا گیا ہے کہ دھماکے میں دو چینی باشندے لی جون اور سن ہوازین سمیت 3 افراد جاں بحق ہوئے، دھماکے میں وقار، الیاس، نعیم، رانو خان، عظیم، طارق، علی، حمزہ، صبیح سمیت 12 سے زائد افراد زخمی ہوئے۔
خودکش دھماکے کی ذمہ داری بلوچستان لبریشن آرمی نے قبول کر لی ہے، دھماکے میں 15 گاڑیاں مکمل طور پر تباہ ہوئیں، واقعے کا مقدمہ تھانہ ایئرپورٹ کے ایس ایچ او کی مدعیت میں درج کیا گیا ہے، جس میں قتل، اقدام قتل، حملہ، دھماکا خیز مواد، دہشت گردی سمیت دیگر دفعات کے تحت درج کیا گیا ہے، یہ مقدمہ سی ٹی ڈی میں درج کیا گیا ہے۔
مقدمے میں بی ایل اے کے کمانڈر بشیر احمد بلوچ عرف بشیر زیب اور عبدالرحمان عرف رحمان گل کو نامزد کیا گیا ہے۔
