اسلام آباد: سینئر رہنما پاکستان تحریک انصاف (پی ٹی آئی) اسد قیصر نے سربراہ جمعیت علمائے اسلام (ف) مولانا فضل الرحمان سے ٹیلی فونک رابطے کا احوال بتا دیا۔
اسد قیصر نے سماجی رابطوں کی سائٹ ایکس پر جاری پیغام میں بتایا کہ مولانا فضل الرحمان سے ٹیلی فونک رابطہ ہوا جس میں انہوں نے شنگھائی تعاون تنظیم (ایس سی او) کانفرنس کے تناظر میں احتجاج مؤخر کرنے کی اپیل کی۔
سینئر رہنما پی ٹی آئی کے مطابق مولانا فضل الرحمان نے بانی کو طبی سہولتوں کی فراہمی اور ذاتی معالج تک رسائی کا مطالبہ کیا جبکہ ان سے آئینی مسودے پر بھی تفصیلی گفتگو ہوئی۔
انہوں نے بتایا کہ جے یو آئی (ف) مسودے کے اکثر نکات پر دونوں جماعتوں میں ہم آہنگی ہے، مسودے پر مزید غور و فکر کیلیے 17 اکتوبر کو دونوں جماعتوں کا اجلاس ہوگا جس میں مسودے کو حتمی شکل دی جائے گی۔
ان کا کہنا تھا کہ میں نے مولانا فضل الرحمان کو ان کی تجاویز پارٹی کے سامنے پیش کرنے کا یقین دلایا، مشاورت کے بعد ان کو پارٹی فیصلے سے آگاہ کیا جائے گا۔
قبل ازیں، ذرائع نے اے آر وائی نیوز کو بتایا تھا کہ سربراہ جے یو آئی (ف) سے سینئر رہنما پی ٹی آئی کا ٹیلیفونک رابطہ ہوا جس میں دونوں رہنماؤں کے درمیان آئینی ترامیم پر مشاورت اور کمیٹیوں کی جلد ملاقات پر تبادلہ خیال ہوا۔
