بھارتی سیاستدان بابا صدیق کی ٹارگٹ کلنگ کے بعد بالی ووڈ اداکار سلمان خان سخت سیکیورٹی حصار میں تعزیت کے لیے ان کے گھر پہنچ گئے۔
اس موقع پر سلمان خان کافی جذباتی دکھائی دیے، پاپارازی فوٹو گرافرز کی جانب سے کھینچی گئی تصاویر اور ویڈیوز میں نظر آرہا ہے کہ ہفتے کے روز بابا صدیقی کی موت کے بعد سلمان خان اتوار کی شام ان کے خاندان سے ملنے پہنتے کافی سوگوار نظر آئے۔
بابا صدیقی کے گھر کے اطراف اس وقت خاصی افراتفری مچ گئی جب سلمان خان بابا کے خاندان سے ملنے اور تعزیت کے لیے پہنچے، بالی ووڈ اسٹار کے ڈبل سیکیورٹی حصار بنایا گیا تھا۔
سیکورٹی کے گھیرے میں ہونے کے باوجود جب وہ رہائش گاہ سے نکلے تو ان کے گرد لوگوں کا ایک ہجوم تھا، ویڈیو میں دیکھا جاسکتا ہے کہ سلمان کے باڈی گارڈ شیرا کو بھیڑ کے درمیان سے گزرتے ہوئے ان کے لیے راستہ بنارہے ہیں۔
بابا صدیقی کی موت کی خبر پر سب سے پہلے بالی ووڈ اسٹار سنجے دت اسپتال پہنچے تھے جبکہ سلمان خان کے بھی لیلاوتی اسپتال پہنچنے کی اطلاعات سامنے آئی تھیں، بالی ووڈ اسٹار اور بابا صدیقی کافی اچھے دوست ہے۔
خیال رہے کہ گزشتہ دنوں بھارتی نیشنلسٹ کانگریس پارٹی کے رہنما بابا صدیق کو ممبئی میں فائرنگ کرکے قتل کردیا گیا تھا۔
این سی پی کے رہنما بابا صدیق کو ممبئی کے علاقے باندرہ میں سلمان خان کے گھر کے قریب تین نامعلوم افراد نے اس وقت نشانہ بنایا جب وہ اپنے بیٹے کے آفس سے باہر نکلے تھے۔
حملہ آوروں نے بابا صدیق پر چھ گولیاں چلائیں جن میں سے تین گولیاں لگیں، وزیر اعلیٰ ایکناتھ شندے کا کہنا تھا کہ ممبئی پولیس چیف نے انہیں بتایا ہے کہ بابا صدیق کے قتل کے شبے میں دو مشتبہ افراد کو گرفتار کیا گیا ہے۔
گرفتار ہونے والے افراد میں سے ایک کا تعلق یوپی اور دوسرے کا ہریانہ سے بتایا گیا جبکہ تیسرا حملہ آور فرار ہونے میں کامیاب ہوگیا تھا جس کی تلاش میں پولیس چھاپے مار رہی ہے۔
