اسلام آباد : نامزد چیف جسٹس یحییٰ آفریدی نے رجسٹرار آفس کو آئینی بنچ پر پالیسی دے دی اور کہا جن کیسز میں قانون چیلنج ہو ان کی الگ کیٹیگری بنے گی۔
تفصیلات کے مطابق سپریم کورٹ میں آئینی بینچز کو مقدمات کی منتقلی کا سلسلہ جاری ہے، نامزد چیف جسٹس یحییٰ آفریدی کی سربراہی میں 3 رکنی بنچ نے کیس کی سماعت کی۔
اسلام آباد میں شُفہ سے متعلق مقدمہ آئینی بنچ کو بھجوا دیا گیا، جسٹس شاہدوحید نے کہا کہ اس کیس میں تو آئینی شقوں کی تشریح کرنا ہوگی، یہ مقدمہ تو اب آئینی بینچ کو منتقل ہونا چاہیے، جس پر وکیل سلمان اسلم بٹ کا کہنا تھا کہ یہ کہنا نہیں چاہتا تھا لیکن ہونا یہی چاہیے۔
نامزد چیف جسٹس یحییٰ آفریدی نے کہا کہ رجسٹرارآفس کوآئینی بنچ سےمتعلق پالیسی دیدی ہے، جن کیسز میں کوئی قانون چیلنج ہو ان کی الگ کیٹیگری بنانےکی ہدایت کی ہے۔
جسٹس یحییٰ آفریدی کا کہنا تھا کہ آئین کی تشریح کی ضرورت والےمقدمات ساتھ ساتھ منتقل کرتے رہیں گے۔
خیال رہے سپریم کورٹ کے مختلف بنچز نے گزشتہ روز بھی مقدمات آئینی بنچ منتقل کیے تھے۔
