اسلام آباد: پاکستان میں پولیو کے مزید 3 نئے کیسز سامنے آئے ہیں، ضلع چاغی میں 4 سال بعد پولیو وائرس کا پہلا کیس رپورٹ ہوا، ملک بھر میں رواں سال پولیو کیسز کی تعداد 45 ہوگئی۔
تفصیلات کے مطابق ملک میں 24 گھنٹے کے دوران پولیو کے 3 کیسز سامنے آگئے، این سی او سی کا کہنا ہے کہ اب تک ملک میں رواں سال پولیو کیسز کی تعداد 45 ہوگئی ہے۔
رپورٹ کے مطابق ضلع چاغی میں 4 سال بعد پولیو وائرس کا پہلا کیس رپورٹ ہوا، ضلع چاغی افغان مہاجر کیمپ گردی میں رہائش پذیر 5 سالہ بچی میں پولیو کی تصدیق ہوئی۔
این سی او سی کے مطابق ڈی آئی خان اور لکی مروت سے بھی پولیو کیسز رپورٹ ہوئے، لکی مروت کی رہائشی بچی میں پولیو وائرس پایا گیا۔
ڈی آئی خان کا رہائشی بچہ پولیو وائرس سے متاثر ہوا، متاثرہ بچوں میں وائلڈ پولیو وائرس ٹائپ ون پایا گیا ہے، رواں سال بلوچستان سے 22 پولیو کیس رپورٹ ہوچکے ہیں۔
اس کے علاوہ سندھ 12، خیبرپختونخوا سے 9 پولیو کیسز رپورٹ ہوئے ہیں، رواں سال پنجاب اور اسلام آباد سے ایک، ایک پولیو کیس رپورٹ ہوا۔
یاد رہے کہ ملک بھر میں انسداد پولیو مہم 28 اکتوبر سے 3 نومبر تک جاری ہے اس موقع پر 5 سال سے کم عمر کے ساڑھے 4 کروڑ سے زائد بچوں کو انسداد پولیو ویکسین کے قطرے پلائے جائیں گے۔
تمام والدین کے لیے ضروری ہے کہ وہ اس ملک گیر پولیو ویکسینیشن مہم کے دوران پولیو کے قطرے پلوانے کے لیے اپنے دروازے کھولیں اور اس بات کو یقینی بنائیں کہ 5 سال سے کم عمر کے تمام بچوں کو پولیو کے تباہ کن اثرات سے محفوظ رکھنے کے لیے پولیو ویکسین کے دو قطرے پلائے جائیں۔
