کراچی ایئرپورٹ پر پر اے ایس ایف نے کارروائی میں دبئی جانے والے مسافر سے ایک کروڑ 70 لاکھ روپے سے زائد مالیت کی غیر ملکی کرنسی برآمد کرلی گئی۔
تفصیلات کے مطابق کراچی کے جناح انٹر نیشنل ایئرپورٹ پر اے ایس ایف نے بڑی کارروائی کے دوران ایک کروڑ 70 لاکھ روپے سے زائد مالیت کی غیر ملکی کرنسی کی اسمگلنگ کی کوشش ناکام بنادی اور مسافر کو گرفتار کرلیا گیا۔
اے ایس ایف کے مطابق مسافر محمد احمد الیاس غیر ملکی ایئرلائن کی پرواز کے ذریعے دبئی جانا چاہ رہا تھا اے ایس ایف کے عملے نے مسافر کے سامان کی سرچ کرنے کے دوران بیگ کی تلاشی لی۔
اے ایس ایف ترجمان کے مطابق بیگ میں سے17ملین روپے مالیت کی غیر ملکی کرنسی برآمد کرلی گئی، مسافر سے برآمد ہونے والی غیر ملکی کرنسی میں 2 لاکھ 25 ہزار سے زائد اماراتی درہم اور سعودی ریال شامل ہیں۔
اے ایس ایف ترجمان کے مطابق ملزم کو ابتدائی تفتیش کے بعد مزید قانونی کارروائی کے لیے برآمد شدہ غیر ملکی کرنسی کے ساتھ کسٹمز حکام کے حوالے کردیا گیا۔
