امریکا کے نو منتخب صدر ڈونلڈ ٹرمپ نے روسی صدر ولادمیر پیوٹن سے ٹیلیفونک رابطہ کیا ہے اور امن و امان بحال کرنے اور کشیدگی کم کرنے کا مشورہ دیا ہے۔
امریکی خبر رساں ادارے واشنگٹن پوسٹ کے مطابق ٹرمپ نے روسی صدر سے یوکرین جنگ کو مزید نہ بڑھانے کا بھی کہا۔ انہوں نے کہا کہ جنگ سے بچا جائے کیونکہ یورپ میں امریکی فوج بھی موجود ہے۔
ڈونلڈ ٹرمپ نے تجویز دی کہ ممکن ہے کہ زمینی قبضے کا لین دین کر کے امن معاہدہ ہو جائے۔ ٹرمپ نے یوکرینی صدر سے بھی رابطہ کیا اور خطے کے امن سے متعلق تشویش سے آگاہ کیا۔
دوسری جانب ٹرمپ نے حکومت سازی کے لیے پیش رفت کرتے ہوئے کئی ناموں پر غور شروع کر دیا ہے، ایلون مسک، رابرٹ کینیڈی جونیئر اور وویک راماسوامی کے نام فائنل کر لیے گئے ہیں۔
امریکی میڈیا رپورٹس کے مطابق حکومت سازی کے سلسلے میں وزیر خارجہ کے لیے سینیٹر مارکو روبیو، وزیر دفا ع کے لیے آرمڈ سروسز کمیٹی کے چیئرمین مائیک راجر کے نام پر غور کیا جا رہا ہے، فلوریڈا میں ٹرمپ کی رہائش گاہ پر نئی انتظامیہ کے لیے انٹرویوز کا سلسلہ بھی جاری ہے۔
ٹرمپ پہلے ہی سوزی وائلز کو چیف آف اسٹاف مقرر کر کے تاریخ رقم کر چکے ہیں، صدر منتخب ہونے کے اگلے ہی دن انھوں نے اعلان کیا تھا کہ ان کی مہم کی شریک چیئر سوزی وائلز ان کی چیف آف اسٹاف ہوں گی۔ وائلز فلوریڈا کی ایک تجربہ کار سیاسی کارکن ہیں، وہ اس عہدے پر کام کرنے والی امریکی تاریخ کی پہلی خاتون ہوں گی۔
امریکا نے اسرائیل کو بلڈوزر کی ترسیل روک دی
پاکستانی نژاد ری پبلکن ساجد تارڑ نے کہا ہے کہ ٹرمپ اپنی کابینہ میں ایسے لوگوں کو شامل کریں گے جو امریکا میں کرپشن کے خاتمے کے لیے کوشاں رہیں گے۔
