اسلام آباد : پاک فضائیہ کے سربراہ ایئر چیف مارشل ظہیر احمد بابر سدھو کو بحرین کے اعلیٰ فوجی اعزاز سے نواز دیا گیا۔
تفصیلات کے مطابق پاک فوج کے شعبہ تعلقات عامہ ( آئی ایس پی آر ) کی جانب سے بیان میں کہا گیا کہ ایئر چیف مارشل ظہیر احمد بابر سدھو کو برادر ممالک کے درمیان فوجی اور دفاعی تعاون کو فروغ کے لئے شاندار کاوشوں کے اعتراف میں بحرین میڈل فرسٹ کلاس کے ایوارڈ سے نوازا گیا۔
آئی ایس پی آر کا کہنا تھا کہ ایوارڈ کی تقریب بحرین کے سخیر ایئر بیس پر منعقد ہوئی، جس میں مملکت بحرین کی اعلیٰ سول اور فوجی قیادت نے شرکت کی۔
ترجمان نے کہا کہ بحرین کے فرمانروا شاہ حمد بن عیسیٰ الخلیفہ کی جانب سے بحرین کے نائب فرمانروا شہزادہ سلمان بن حمد الخلیفہ نے ایئر چیف مارشل ظہیر احمد بابر سدھو کو ایوارڈ سے نوازا۔
اس موقع پر بحرین انٹرنیشنل ایئر شو میں جے ایف 17 بلاک تھری لڑاکا طیاروں کی بھرپور شرکت پر بحرینی نائب فرمانروا کا ائیر چیف سے اظہار تشکر کیا جبکہ پاک فضائیہ کے سربراہ نے بحرین میڈل فرسٹ کلاس دیئے جانے پر شکریہ ادا کیا۔
بحرین انٹرنیشنل ائیر شو کے موقع پر امریکی ائیر فورس سینٹرل کمانڈ کے کمانڈر لیفٹیننٹ جنرل ڈیرک فرانس کی پاک فضائیہ کے سربراہ سے ملاقات بھی ہوئی۔
ائیر چیف نے دونوں سٹریٹجک پارٹنرز کے درمیان موجودہ دوطرفہ تعاون کو مزید بڑھانے کے عزم کا اعادہ کیا جبکہ امریکی کمانڈر نے علاقائی امن کے فروغ میں پاکستان کی کوششوں کو سراہا۔
آئی ایس پی آر کے مطابق امریکی کمانڈر کا مشترکہ تربیتی مشقوں اور فوجی تعاون کے شعبوں میں تعاون بڑھانے کے عزم کا اظہار کیا،
اس کے علاوہ ائیر چیف کی بحرین ڈیفنس فورس کے کمانڈر انچیف فیلڈ مارشل شیخ خلیفہ بن احمد الخلیفہ سے بھی ملاقات ہوئی۔
