کراچی کے علاقے باوانی چالی سائٹ ایریا میں باپ نے کمسن بیٹے کو تشدد کا نشانہ بنا ڈالا۔
اے آر وائی نیوز کے مطابق افسوسناک واقعہ کراچی کے علاقے باوانی چوک سائٹ ایریا میں پیش آیا جہاں سفاک باپ نے بچے پر راڈ سے تشدد کیا اور اسے گرم توے پر بٹھا دیا۔
تھانہ سائٹ ایریا پولیس نے ملزم نجیب اللہ کو گرفتار کرلیا ہے۔
ایس ایس پی کیماڑی فیضان کا کہنا ہے کہ ملزم نے بتایا کہ بچہ گھر میں بتائے بغیر کھیلنے چلا جاتا تھا جس پر اسے غصہ تھا۔
پولیس حکام کا کہنا ہے کہ ملزم کے خلاف سرکار کی مدعیت میں کیماڑی پولیس نے مقدمہ درج کرلیا ہے۔
واضح رہے کہ رواں سال 2 جولائی کو کراچی میں جائیداد میں حصے کے لیے والد پر تشدد کرنے والے بیٹے کو پولیس نے گرفتار کیا تھا۔
باپ جاوید کا الزام تھا کہ چھوٹا بیٹا جائیداد میں اپنا حصہ لینے کے لیے آبائی گھر فروخت کرانا چاہتا ہے، انکار پر اپنے دوستوں کے ساتھ مجھے اور میرے بڑے بیٹے کو وحشیانہ تشدد کا نشانہ بنایا۔
اس حوالے سے ڈی آئی جی ایسٹ اظفر مہیسر کا کہنا تھا کہ جاوید نامی شہری کی ویڈیو سوشل میڈیا پر وائرل ہوئی تھی، ویڈیو پر کارروائی کرتے ہوئے بیٹے حسان کو گرفتار کیا گیا ہے۔
ان کا کہنا تھا کہ ملزم بیٹے کے خلاف والد کی مدعیت میں تھانہ سچل میں مقدمہ درج ہے۔
