راولپنڈی: پاک افغان سرحد سے ایک گروہ کی دراندازی کی کوشش میں 3 خوارج ہلاک ہوگئے۔
پاک فوج کے شعبہ تعلقات عامہ (آئی ایس پی آر) کے مطابق پاک افغان سرحد سے خوارج کے ایک گروہ نے دراندازی کی کوشش کی، گروہ شمالی وزیرستان کے علاقے حسن خیل سے داخل ہونے کی کوشش کررہا تھا۔
سیکیورٹی فورسز کی موثر کارروائی میں 3 خوارج مارے گئے۔
ترجمان پاک فوج کا کہنا ہے کہ پاکستان بار بارموثر بارڈر مینجمنٹ کے لیے کہہ چکا ہے، توقع ہے افغان عبوری حکومت اپنی سرزمین خوارج کو استعمال نہیں کرنے دے گی۔
آئی ایس پی آر کا کہنا ہے کہ سیکیورٹی فورسز دہشت گردی کے خاتمے کے لیے پُرعزم ہیں۔
وزیر داخلہ محسن نقوی کا کہنا ہے کہ خوارجی دہشت گردوں کے مذموم عزائم ناکام بنانے پرسیکیورٹی فورسز کو شاباش دیتے ہیں۔
انہوں نے کہا کہ پاکستان کی سیکیورٹی فورسز انتہائی پروفیشنل اور باصلاحیت ہیں، قوم سیکیورٹی فورسز کی کامیابیوں کو تحسین کی نگاہ سے دیکھتی ہے۔
