پاکستان اور زمبابوے کے خلاف سیریز کا فیصلہ کن ون ڈے کل کھیلا جائے گا لیکن فائنل میچ سے قبل قومی ٹیم کے دو اہم کھلاڑی زخمی ہوگئے ہیں۔
پاکستان اور زمبابوے کے درمیان تین ون ڈے میچوں کی سیریز ایک، ایک سے برابر ہے۔ تیسرا اور فیصلہ کن میچ کل بلاوائیو میں کھیلا جائے گا۔
تاہم اس فیصلہ کن میچ سے قبل پاکستان ٹیم کے لیے بری خبر ہے کہ اس کے دو اہم کھلاڑی زخمی ہوگئے ہیں۔ فاسٹ بولر شاہنواز دھانی اور احمد دانیال زخمی ہونے کے بعد تیسرے ون ڈے میچ کے لیے ٹیم سے باہر ہو گئے ہیں۔
سلیکٹرز نے دونوں زخمی کھلاڑیوں کی جگہ عباس آفریدی اور جہاں داد خان کو ون ڈے اسکواڈ میں شامل کر لیا ہے تاہم آخری میچ میں ٹیم میں کسی بھی تبدیلی کا امکان نہیں ہے۔
عباس آفریدی اور جہانداد خان ٹی 20 اسکواڈ کا بھی حصہ ہیں جب کہ ٹی 20 سیریز میں احمد دانیال کی جگہ عامر جمال کو ٹیم میں شامل کیا گیا ہے۔
زخمی دونوں کھلاڑیوں کو دورہ زمبابوے میں اب تک کھیلنے کا موقع نہیں ملا اور وہ بینچ پر بیٹھے رہے۔
واضح رہے کہ ون ڈے سیریز کے پہلے میچ میں میزبان زمبابوے نے سرپرائز دیتے ہوئے پاکستان کو ڈرک ورتھ لوئس قانون کے تحت 80 رنز سے ہرایا تھا لیکن دوسرے ون ڈے میں شاہینوں نے پلٹ کر وار کیا اور میچ 10 وکٹوں سے اپنے نام کیا۔
سیریز کا فیصلہ کن ون ڈے کل (جمعرات) پاکستانی وقت کے مطابق دوپہر ساڑھے 12 بجے کھیلا جائے گا۔
