شام میں معزول ومفرور صدر بشار الاسد کے والد اور ملک پر تین دہائیوں حکومت کرنے والے سابق صدر حافظ الاسد کے مقبرے کو جلا دیا گیا۔
شام میں بشار الاسد کے اقتدار چھوڑ کر ملک سے فرار ہونے اور باغی اپوزیشن کی حکمرانی قائم ہونے کے بعد باغی اسد خاندان کی تمام یادوں کو مٹا اور تباہ کر رہے ہیں۔
غیر ملکی میڈیا کے مطابق شامی باغیوں نے سابق صدر حافظ الاسد کے مزار کو نذر آتش کیا۔ تین دہائیوں تک شام کے صدر رہنے والے حافظ الاسد کا مزار علوی برادری کے مرکز لطاکیہ میں واقع ہے جہاں ان کے مقبرے کو باغیوں نے جلا ڈالا۔
انٹرنیشنل میڈیا کی ان ویڈیوز میں فوجی یونیفارم میں ملبوس باغی اور نوجوانوں کو جلتے مقبرے کے قریب کھڑے دیکھا جا سکتا ہے۔
فوٹیج میں دیکھا جا سکتا ہے کہ مزار کے کچھ حصے کو آگ لگی ہوئی ہے اور اسے شدید نقصان پہنچا ہے۔
واضح رہے کہ شام میں بغاوت کے بعد باغیوں نے بشار الاسد کے صدارتی محل میں بھی داخل ہو کر لوٹ مار کی تھی جب کہ مظاہرین نے ملک بھر میں حافظ الاسد، ان کے بیٹے اور جانشین بشارالاسد کے مجسمے بھی گرائے گئے۔
