پشاور: موسم سرما کی تعطیلات کے باوجود کے پی میں نجی اسکولوں کو ’ونٹر کیمپ‘ لگانے کی اجازت دے دی گئی۔
تفصیلات کے مطابق محکمہ تعلیم خیبرپختونخوا کی جانب سے موسم سرما کی تعطیلات کے باوجود ذیلی ادارے کے پی پرائیویٹ اسکولز ریگولیشن اتھارٹی نے نجی تعلیمی اداروں کو ونٹر کیمپ لگانے کی اجازت دے دی۔
اس حوالے سے مانسہرہ کے قانون دان ڈاکٹر محمد ثاقب لغمانی نے محکمہ تعلیم و وزارت تعلیم کو خط لکھ کر کہا ہے کہ چھٹیوں کے نوٹیفکیشن کے باوجود ذیلی ادارے کا نجی اسکولوں کو ونٹر کیمپ کی اجازت دینا حیران کن ہے۔
انھوں نے کہا شدید سرد موسم میں تعلیمی اداروں میں کوئی ہیٹنگ سسٹم ہے نہ ہی بچوں کی مناسب دیکھ بھال ممکن ہے، سرد ترین موسم کے سبب ونٹر کیمپ کی وجہ سے بچوں کے بیمار پڑنے کے سنگین خدشات موجود ہیں۔
محکمہ موسمیات کی ملک میں سردی مزید بڑھنے کی پیشگوئی
ڈاکٹر ثاقب لغمانی نے صوبائی وزیر سمیت متعلقہ افسران سے مطالبہ کیا ہے کہ مذکورہ نوٹیفکیشن منسوخ کر کے بچوں کو موسمی شدت سے بچایا جائے۔
واضح رہے کہ محکمہ تعلیم خیبرپختونخوا کے مطابق کے پی کے میدانی علاقوں میں اسکول 22 دسمبر سے 31 دسمبر تک بند رہیں گے جب کہ صوبے کے پہاڑی علاقوں میں اسکول 22 دسمبر سے 28 فروری تک بند رکھنے کا اعلان کیا گیا ہے۔
