کراچی: روشنیوں کا شہر حادثات کا شہر بن گیا ہے، کراچی میں حادثات کے گزشتہ تمام ریکارڈ ٹوٹ گئے، دوسری طرف سال 2024 خونی سال بھی ثابت ہوا ہے۔
تفصیلات کے مطابق سال 2024 کراچی کے شہریوں کے لیے خونی ثابت ہوا، ایک طرف ڈکیتی مزاحمت پر 112 افراد جان سے گئے، تو دوسری جانب 9 ہزار کے قریب ٹریفک حادثات میں 775 کے قریب شہری جاں بحق اور 8 ہزار سے زائد زخمی ہوئے۔
رواں سال کراچی کے شہریوں پر بجلی بن کر گرا ہے، سال 2024 میں حادثات کی شرح تشویشناک حد تک بڑھنے کے بعد آئی جی سندھ نے نہ صرف ٹریفک پولیس میں ایس پی کی سطح پر تبدیلیاں کیں، بلکہ یکم جنوری سے خصوصی مہم چلانے کا اعلان بھی کر دیا ہے۔
حادثات کا تناسب دیکھا جائے تو روزانہ 25 حادثات میں 2 سے 3 شہری اپنی قیمتی جانوں سے محروم ہوئے، پے در پے ہونے والے حادثات سے شہریوں کے دلوں میں خوف بیٹھ گیا ہے۔
چھیپا فاؤنڈیشن کے مطابق کراچی میں حادثات کے گزشتہ تمام ریکارڈ ٹوٹ گئے ہیں، رواں سال اب تک 9 ہزار کے قریب ٹریفک حادثات ہوئے جن میں 7 سو 71 شہری جاں بحق ہوئے، جب کہ 8 ہزار 174 افراد زخمی ہوئے۔
جنوری میں 94 افراد جاں بحق 734 زخمی ہوئے، فروری میں 57 افراد جاں بحق 720 زخمی ہوئے، مارچ میں 49 افراد جاں بحق 521 زخمی ہوئے، اپریل میں 64 افراد جاں بحق 490 زخمی ہوئے، مئی میں 48 افراد جاں بحق 464 زخمی ہوئے۔
جون میں 73 افراد جاں بحق 649 زخمی ہوئے، جولائی میں 35 افراد جاں بحق 627 زخمی ہوئے، اگست میں 45 افراد جاں بحق 521 زخمی ہوئے، ستمبر میں 70 افراد جاں بحق 781 زخمی ہوئے، اکتوبر میں 66 افراد جاں بحق 980 زخمی ہوئے، نومبر میں 90 افراد جاں بحق 989 زخمی ہوئے، اور دسمبر میں اب تک 80 افراد جاں بحق 700 زخمی ہو چکے ہیں۔
سب سے زیادہ جنوری نومبر اور دسمبر میں جانیں گئیں، جب کہ ستمبر، اکتوبر اور نومبر میں سب سے زیادہ زخمی ہوئے۔
