کرم کے حالات پر کوہاٹ میں گرینڈ جرگہ ہوا جس میں اسلحہ جمع کروانے کے نکتے پر ڈیڈلاک برقرار ہے۔
اے آر وائی نیوز کے مطابق ذرائع کا کہنا ہے کہ طوری قبایلہ بھاری ہتھیاروں سے دستبردار ہونے پر آمادہ نہیں، مرکزی شاہراہ اور دیگر سڑکیں کھولنے کا بھی فیصلہ نہ ہوسکا۔
صوبائی مشیر اطلاعات بیرسٹر سیف نے امید ظاہر کی معاہدے پر آج یا کل دستخط ہوسکتے ہیں۔
بیرسٹر سیف نے کہا کرم میں بھاری اسلحہ سرینڈر کرنے پر کچھ لوگوں کے تحفظات ہیں، جب تک اسلحہ سرینڈر نہیں ہوگا، سڑک نہیں کھولی جائے گی، گرینڈ جرگے کو دو دن کا وقت دیا ہے۔
مشیر صحت کے پی احتشام علی نے بتایا کہ دواؤں کی عدم دستیابی کے باعث کرم میں 19 بچوں کی موت کی خبرغلط ہے، دواؤں کی مزید دو کھیپ بھی جلد کرم پہنچ جائیں گی۔
یاد رہے کہ جرگہ میں مسلسل ڈیڈ لاک اور کسی متفقہ فیصلہ نہ ہوپانے کے باعث پاراچنار مرکزی شاہراہ سمیت آمدروفت کے تمام راستے 72 روز سے بند ہیں۔
