راولپنڈی : چیئرمین تحریک انصاف بیرسٹر گوہر کا کہنا ہے کہ کوئی ڈیل نہیں ہو رہی ایسا ہوتا توعوام سے نہ چھپاتے۔
تفصیلات کے مطابق چیئرمین تحریک انصاف بیرسٹر گوہر نے بانی پی ٹی آئی سے ملاقات کے بعداڈیالہ جیل کے باہر گفتگو میں کہا کہ کئی بارایسا ہو جاتا ہے کہ فیصلے لکھنے میں دیر ہوجاتی ہے ، کل کی اطلاع ہمیں یہی تھی کہ 190ملین پاؤنڈ کا فیصلہ دیا جائے گا۔
انھوں نے بتایا کہ بانی پی ٹی آئی نے کہا مجھے بتایا گیا تھا کہ نو بجے آجاؤ، جب وکلا آجائیں گے توپیش ہو جاؤں گا، جب سے جیل میں ہوں کوئی بھی ٹرائل 11بجے سے پہلے نہیں ہوا، کوئی ڈیل نہیں ہو رہی۔
بیرسٹر گوہر کا کہنا تھا کہ مذاکرات کیلئے 16 تاریخ کو بلایا گیا ہے ہماری ٹیم جائے گی ، اپنے مطالبات تحریری طور پر دیئے جائیں گے، جوڈیشل کمیشن کا قیام اور اسیران کی رہائی ہمارے مطالبات ہیں، ملک کی خاطرمذاکرات ہونے چاہئیں اور کامیاب ہونے چاہئیں۔
انھوں نے واضح کیا کہ کوئی ڈیل نہیں ہو رہی ایسا کچھ ہوتا تو پبلک سے نہ چھپاتے، مذاکرات وہی ہو رہے ہیں جو حکومت کے ساتھ ہو رہے ہیں۔
صحافی نے سوال کیا کہ آرمی چیف کیساتھ علی امین گنڈاپور کی ملاقات ہوئی کیایہ خوش آئند ہے؟ جس پر چیئرمین پی ٹی آئی نے کہا کہ امن وامان کی صورتحال پراہم ملاقاتیں ہوتی رہتی ہیں ورکنگ ریلیشن بھی رکھنا ہوتا ہے۔
