وزیر اعلیٰ پنجاب مریم نواز کا کہنا ہے کہ القادر یونیورسٹٰ میرے پاس آگئی ہے اس کے بچوں کو جادو، تعویز نہیں سکھایا جائے گا۔
اے آر وائی نیوز کے مطابق اوکاڑہ میں تقریب سے خطاب کرتے ہوئے وزیر اعلیٰ پنجاب مریم نواز نے کہا کہ القادر یونیورسٹی کے بچوں کو بھی اسکالر شپ دوں گی، اس یونیورسٹی میں اب دینی اور دنیاوی دونوں تعلیم دی جائے گی آپ لوگوں کو جادو تعویز نہیں سکھایا جائے گا۔
انہوں نے کہا کہ چور چور کہنے والوں پر آج خود چوری ثابت ہوگئی، تاریخ کا پہلا وزیراعظم ہے جو رشوت لیتے ہوئے رنگے ہاتھوں پکڑا گیا ہے۔
وزیر اعلیٰ پنجاب کا کہنا تھا کہ آج کے فیصلے کے بعد پاکستان اسٹاک مارکیٹ میں تیزی دیکھی گئی، یہ شخص اسی اڈیالہ جیل میں قید ہیں جس میں نواز شریف اور میں قید تھے، میرے سیل میں کیمرے لگائے گئے تھے، جیل میں ایک وقت کا کھانا دیا جاتا تھا، اچھی بات ہے میرا وزن کم ہو گیا۔
ان کا کہنا تھا وقت ہمیشہ ایک جیسا نہیں رہتا، اس شخص کو جیل میں اچھا کھانا اور دیگرسہولیات مل رہی ہیں ہمیں کوئی اعتراض نہیں ہے۔
مریم نواز کا کہنا تھا القادر یونیورسٹی سرکاری تحویل میں دے دی گئی ہے، اب وہ یونیورسٹی میرے پاس آگئی ہے، القادر یونیورسٹی کے طلبا کو بھی اسکالرشپ دی جائے گی۔
یاد رہے کہ احتساب عدالت نے القادر یونیورسٹی ٹرسٹ کیس میں کرپٹ پریکٹس اور بدعنوانی پر 14 سال قید اور 10 لاکھ روپے جرمانے کی سزا سنائی ہے جبکہ جرم میں معاونت کرنے پر بشریٰ بی بی کو 7 سال قید اور 5 لاکھ روپے جرمانے کی سزا سنائی ہے۔
