کراچی: گزری انویسٹی گیشن پولیس کی حراست سے انتہائی مطلوب ملزم کے فرار کے کیس میں غفلت کے مرتکب ایس آئی او گزری محمد جمن شفقت منگی کو معطل کر کے عہدے سے ہٹا دیا گیا۔
ایس پی انوسٹی گیشن علی حسن کے مطابق فرار ملزم ریاست تاحال پولیس کی گرفت میں نہیں آ سکا ہے، اگر ایس آئی او گزری ملزم کو فرار کرانے میں ملوث پایا گیا، تو اس کے خلاف ایف آئی آر کاٹی جائے گی۔
ایس پی انوسٹی گیشن کا کہنا ہے کہ ایس آئی او نے دعویٰ کیا ہے کہ ملزم گزری تھانے سے فرار ہوا تھا، ایس پی کے مطابق فرار ملزم ریاست کی گرفتاری کے لیے ٹیمیں تشکیل دے دی گئی ہیں، بہت جلد اس کو گرفتار کر لیا جائے گا۔
انھوں نے کہا پنجاب پولیس کی جانب سے حوالے کیے گئے ملزم کو گیسٹ ہاؤس میں ٹھہرانے کے معاملے پر بھی انکوائری کی جا رہی ہے، اس سلسلے میں ڈی ایس پی انوسٹیگیشن کلفٹن شوکت ملہن انکوائری کر رہے ہیں۔
ویڈیو: کراچی کے شہریوں کیلئے بینکوں سے رقم لیکر نکلنا وبال جان بن گیا
ایس پی انوسٹی گیشن کے مطابق فرار ملزم ریاست کے خلاف بوٹ بیسن، گزری اور کلفٹن تھانے میں گھروں میں ڈکیتی کے 3 مقدمات درج ہیں، جن میں ملزم کی نشان دہی ہو چکی تھی، ملزم کے خلاف سندھ اور پنجاب میں چوری اور لوٹ مار سمیت دیگر جرائم کے 100 سے زائد مقدمات درج ہیں۔
