2023 کے اوائل میں بالی ووڈ اداکارہ پریانکا نے بالی ووڈ کے ایک پوڈ کاسٹ میں بالی ووڈ میں سائیڈ لائن کرنے سے متعلق انکشاف کیا تھا جس کے بعد انہوں نے انڈسٹری چھوڑ دی تھی۔
بالی ووڈ اداکارہ پرینکا چوپڑا نے ایک پوڈ کاسٹ میں کہا تھا کہ 2023 کے آغاز میں انہیں محسوس ہوا کہ فلم انڈسٹری میں انہیں سائیڈ لائن کیا جا رہا ہے، اس وجہ سے انہوں نے فلم انڈسٹری چھوڑنے کا فیصلہ کیا تھا۔
پرینکا چوپڑا کے اس انکشاف نے بالی ووڈ کے کئی شخصیات کو حیرت میں ڈال دیا تھا تاہم اب بالی ووڈ کے ایک اور اداکار و ہدایتکار نے پرینکا چوپڑا کے اس فیصلے کو سراہا ہے۔
بھارتی میڈیا رپورٹ کے مطابق اداکار و ہدایتکار شیکھر سمن نے حال ہی میں ایک ٹوئٹ کیا جس میں انہوں نے پرینکا چوپڑا کے بالی ووڈ چھوڑنے کے فیصلے کو سراہاتے ہوئے اپنے تلخ تجربات سے متعلق گفتگو کی۔
شیکھر سمن نے اپنے ٹوئٹ میں اداکار سوشانت سنگھ راجپوت کی خودکشی کی مثال دی کہ کیسے ان کی موت کے بعد بالی ووڈ کا اصل چہرہ سامنے آیا۔
شیکھر سمن نے پوسٹ میں لکھا کہ ’پرینکا چوپڑا کے سنسنی خیز انکشافات کوئی حیرت کی بات نہیں تھی، یہ بات مشہور ہے کہ فلم انڈسٹری کے اندر موجود گینگ کس طرح کام کرتے ہیں، وہ آپ کو دباتے، کچلتے اور ستاتے رہتے ہیں جب تک کہ آپ ختم نہ ہو جائیں، اور یہی سوشانت سنگھ راجپوت کے ساتھ بھی ہوا تھا۔‘
شیکھر سمن نے لکھا کہ ’یہ گینگسٹرز سانپ سے زیادہ خطرناک ہیں، ایسا ہی دوسروں کے ساتھ بھی ہوگا، بالی ووڈ انڈسٹری کا یہی طریقہ ہے، چیزیں اسی طرح خراب ہوتی ہیں، یا اسے قبول کریں یا چھوڑ دیں اور پرینکا نے چھوڑنے کا فیصلہ کیا، شکر ہے کہ انہوں نے یہ فیصلہ کیا، اب ہمارے پاس ایک حقیقی عالمی آئیکون ہے جو ہالی ووڈ میں انڈیا کی نمائندگی کر رہی ہے۔
کسی کا نام لیے بغیر شیکھر سمن نے کہا کہ ’چار لوگ میرے ارد گرد بھی ایسے تھے جنہوں نے مجھے اور پھر میرے بیٹے کو سائیڈ لائن کرنے کی پوری کوشش کی۔
واضح رہے کہ اداکارہ پرینکا چوپڑا نے کچھ عرصہ قبل ایک پوڈ کاسٹ میں کہا تھا کہ ’ انڈسٹری کے کچھ لوگوں نے مجھے سائیڈ لائن کیا جس کے بعد میں نے فیصلہ کیا کہ میں انڈسٹری چھوڑ رہی ہوں۔‘
یاد رہے کہ دوسری جانب اداکارہ پرینکا چوپڑا ایک لمبے عرصے بعد بھارتی سینما میں ’ایس ایس ایم بی 29‘ سے کم بیک کرنے جا رہی ہیں۔
