راولپنڈی: آرمی چیف جنرل عاصم منیر کا کہنا ہے کہ عسکری قیادت بھرپور عوامی حمایت سے آئینی ذمہ داریوں کو پورا کرنے کیلیے پرعزم ہے۔
فوج کے شعبہ تعلقات عامہ (آئی ایس پی آر) کے مطابق آرمی چیف جنرل عاصم منیر کی زیرِ صدارت 267ویں کور کمانڈرز کانفرنس منعقد ہوئی جس میں امن و استحکام کیلیے شہدائے افواج، اداروں اور شہریوں کی لازوال قربانیوں کو زبردست خراج عقیدت پیش کیا گیا جبکہ درپیش خطرات کا مفصل جائزہ لیتے ہوئے علاقائی و داخلی سلامتی کے منظر نامے پر روشنی ڈالی گئی۔ ایل او سی اور ورکنگ باؤنڈری کے ساتھ موجودہ صورتحال پر تبادلہ خیال کیا گیا۔
یہ بھی پڑھیں: مسلح افواج قابل فخر قوم کے تعاون سے دوست نما دشمنوں کو مسترد کر دیں گے، آرمی چیف
فورم نے یوم یکجہتی کشمیر کے موقع پر کشمیر کے پُرعزم لوگوں کے ساتھ اظہار یکجہتی کیا، مقبوضہ وادی میں انسانی حقوق کی خلاف ورزیوں کی شدید مذمت کی اور خلاف ورزیوں کو خطے کے امن کیلیے سنگین خطرہ قرار دیا۔
شرکا نے کشمیری عوام کے حق خودارادیت کیلیے ان کی جدوجہد میں پاکستان کی غیر متزلزل حمایت کا اعادہ کیا اور سلامتی کونسل کی قراردادوں کی مسلسل خلاف ورزیوں سے نمٹنے کیلیے عالمی تعاون کی اہمیت پر بھی زور دیا گیا۔
کانفرنس نے بھارتی فوجی قیادت کے حالیہ عاقبت نااندیش اور اشتعال انگیز بیانات کا سخت نوٹس لیا اور انہیں غیر ذمہ دارانہ اور علاقائی استحکام کیلیے نقصان دہ قرار دیا۔
اس موقع پر آرمی چیف جنرل عاصم منیر نے کہا کہ پاک فوج ملکی خودمختاری اور سالمیت کے دفاع کیلیے پوری طرح تیار ہے، بھارتی فوج کے کھوکھلے بیانات ان کی بڑھتی ہوئی مایوسی کی نشاندہی کرتے ہیں، کسی بھی مہم جوئی کا پاکستان مکمل طاقت کے ساتھ جواب دے گا، بیانات عالمی برادری کی توجہ بھارت کے اندرونی خلفشار سے توجہ ہٹانے کیلیے ہیں، ایسے بیانات بھارت کی انسانی حقوق کی کھلی خلاف ورزیوں سے توجہ ہٹانے کیلیے ہیں۔
فورم نے فتنہ الخوارج کی جانب سے افغان سرزمین کے مسلسل استعمال پر گہری تشویش کا اظہار کیا اور زور دیا کہ عبوری افغان حکومت فتنہ الخوارج کی موجودگی سے انکار کی بجائے ٹھوس اور عملی اقدامات کرے۔
کانفرنس نے واضح کیا کہ افغانستان اور فتنہ الخوارج کے ضمن میں تمام ضروری اقدامات و حکمت عملی جاری رکھی جائے گی اور کسی کو بھی بلوچستان میں امن کو خراب کرنے کی اجازت نہیں دی جائے گی۔
احساس محرومی کے من گھڑت بیانیے کی نفی کیلیے بلوچستان کی سماجی و اقتصادی ترقی میں تیزی کی ضرورت پر زور دیا گیا۔ شرکا نے کہا کہ بلوچستان کے نوجوانوں کو گمراہ اور انتہا پسندی پر مائل کرنے کے مذموم عزائم کو عوامی حمایت سے ناکام بنایا جائے گا۔
آرمی چیف جنرل عاصم منیر نے تمام فارمیشنوں کی آپریشنل تیاریوں کی تعریف کی اور مشن پر مبنی تربیت، روایتی و انسداد دہشتگردی کی مد میں مشترکہ مشقوں کے انعقاد کی اہمیت پر زور دیا۔
انہوں نے کہا کہ عسکری قیادت قوم کو درپیش کثیر الجہتی چیلنجز سے مکمل طور پر آگاہ ہے، عسکری قیادت بھرپور عوامی حمایت سے آئینی ذمہ داریوں کو پورا کرنے کیلیے پرعزم ہے۔
