لدھیانہ: بھارتی پنجاب کے جوڈیشل مجسٹریٹ نے بالی ووڈ اداکار اور سماجی کارکن سونو سود کے خلاف وارنٹ گرفتاری جاری کر دیے۔
بھارتی میڈیا کے مطابق پنجاب کے شہر لدھیانہ کی عدالت نے مبینہ فراڈ کیس میں 51 سالہ اداکار سونو سود کے وارنٹ گرفتاری جاری کیے ہیں۔
بھارتی میڈیا کا کہنا ہے کہ اس کیس میں لودھیانہ سے تعلق رکھنے والے ایک وکیل راجیش کھنہ نے 10 لاکھ روپے کے فراڈ کا مقدمہ دائر کیا اور الزام لگایا کہ مرکزی ملزم موہت شکلا نے اسے جعلی سرمایہ کاری کرنے کا لالچ دیا۔
View this post on Instagram
بھارتی میڈیا کا کہنا ہے کہ عدالت نے اس کیس میں اداکار کی گواہی کیلئے انہیں پیش ہونے کا حکم دیا تھا، عدالت میں پیش نہ ہونے پر لدھیانہ کے جوڈیشل مجسٹریٹ نے اداکار کے وارنٹ جاری کیے ہیں۔
بھارتی میڈیا کے مطابق لدھیانہ کی عدالت نے اوشیوارا پولیس اسٹیشن، اندھیری ویسٹ، ممبئی کے آفیسر انچارج کو سونو سود کو گرفتار کرنے کا حکم دیا ہے۔
بھارتی میڈیا کا کہنا ہے کہ عدالت نے سونو سود کو گرفتار کرکے عدالت میں پیش کرنے کا حکم دیا ہے اور کیس کی اگلی سماعت 10 فروری تک ملتوی کردی ہے۔
