اسلام آباد : وزیراعظم شہباز شریف نے ملکی اداروں کی نجکاری کا عمل تیز کرنےکی ہدایت کرتے ہوئے کہا کہ رکاوٹیں دور کرنے کیلئے اچھی شہرت کے وکلا کی خدمات لی جائیں۔
تفصیلات کے مطابق وزیراعظم شہبازشریف نے نجکاری کے عمل اور نگرانی سے متعلق اجلاس سے خطاب میں کہا کہ اداروں کی نجکاری حکومت کے اڑان پاکستان اقدام کا حصہ ہے، قانونی رکاوٹیں دور کرنے کیلئے اچھی شہرت کے وکلا کی خدمات لی جائیں۔
وزیراعظم کا کہنا تھا کہ حکومت کا کام کاروبار کرنا نہیں، سرمایہ کاری کیلئے سہولت فراہم کرنا ہے، بروقت اصلاحات سے ہی معیشت تیزی سے بہتری کی جانب گامزن ہے۔ پاکستان کی ترقی کیلئے سب کو مل کر کام کرنا ہوگا۔
انہوں نے ہدایت کی کہ متعین کردہ اداروں کی نجکاری کے عمل کو شفافیت پر سمجھوتا کیے بغیر تیز کیا جائے، نجکاری کے عمل کی خود نگرانی کر رہا ہوں، کسی قسم کا تعطل قبول نہیں کیا جائے گا۔
مزید پڑھیں : پی آئی اے کی نجکاری کا عمل دوبارہ شروع کرنے کا فیصلہ
اجلاس میں وزیراعظم شہباز شریف نے نجکاری کے عمل کی نگرانی کے لیے بنائے گئے ٹاسک مینجمنٹ ڈیش بورڈ کا بھی جائزہ لیا۔
یاد رہے حکومت نے پی آئی اے کی نجکاری کا عمل دوبارہ شروع کرنے کا فیصلہ کیا ہے، نجکاری کیلئے رواں ماہ ایکسپریشن آف انٹرسٹ جاری کیا جائے گا، اتحاد اور قطر کی ائیرلائنز پی آئی اے خریداری میں دلچسپی نہیں رکھتیں۔
