کراچی میں 3 فروری کو لاپتہ ہونے والے 20 سالہ نوجوان کو تشدد کے بعد قتل کردیا گیا۔
کراچی پولیس کے مطابق 3 فروری کو لاپتہ ہونے والا 20 سالہ الیاس نوجوان دو روز قبل بے ہوشی حالت میں ملا تھا جس کے بعد دوران علاج دم توڑ دیا۔
حکام کا کہنا ہے کہ دو روز قبل الیاس کلفٹن کے قریب بیہوشی کی حالت میں ملا تھا، گزشتہ روز 20 سالہ الیاس نے جناح اسپتال میں دوران علاج دم توڑا ہے۔
پولیس کا کہنا ہے کہ نوجوان کی موت کے بعد بوٹ بیسن پولیس نے تلاش ڈیوائس کی مدد سے الیاس کی شناخت کی جس کے بعد بوٹ بیسن پولیس نے مقتول کے چچا کی مدعیت میں مقدمہ درج کیا ہے۔
پولیس کا مزید کہنا ہے کہ رات گئے ضابطہ کارروائی کے بعد سرد خانے سے لاش لواحقین کے حوالے کردی گئی دوسری جانب لواحقین کا کہنا ہے کہ الیاس بلدیہ ٹاؤن کا رہائشی اور ملازمت تلاش کرنے کلفٹن گیا تھا۔
لواحقین نے کہا کہ پولیس نے بروقت تلاش ڈیوائس سے شناخت کی کوشش نہیں کی، اب پولیس کا دعویٰ ہے کہ شواہد جمع کررہے ہیں قاتلوں کو پکڑیں گے۔
