راولپنڈی: آرمی چیف جنرل عاصم منیر سے مالدیپ کے چیف آف ڈیفنس فورسز نے ملاقات کی اور پاک فوج کی پیشہ ورانہ محارتوں اور لگن کو سراہا۔
فوج کے شعبہ تعلقات عامہ (آئی ایس پی آر) کے مطابق ملاقات میں علاقائی سکیورٹی صورتحال سمیت باہمی دلچسپی کے امور پر تبادلہ خیال کیا گیا جبکہ دونوں کی جانب سے برادرانہ اور دوستانہ تعلقات پر اطمینان کا اظہار کیا گیا۔
آئی ایس پی آر نے بتایا کہ آرمی چیف اور مالدیپ کے چیف آف ڈیفنس فورسز نے باہمی تعاون کو مزید وسعت دینے کا اعادہ کیا۔
بعدازاں، بنگلہ دیش کی بحریہ کے سربراہ ایڈمرل ایم نظم الحسن نے جی ایچ کیو آمد کے موقع پر آرمی چیف جنرل عاصم منیر سے ملاقات کی جس میں باہمی دلچسپی اور علاقائی سکیورٹی صورتحال پر بات چیت کی گئی۔
آئی ایس پی آر کے مطابق بنگلہ دیشی افواج کی جانب سے یہ دوسرا اعلیٰ سطح دورہ ہے۔ ملاقات میں دفاعی اور سکیورٹی تعاون کے فروغ پر بھی گفتگو کی گئی۔
بنگلہ دیشی نیول چیف نے علاقائی امن و استحکام کیلیے پاکستان کے کردار کو سراہا اور کثیر الملکی مشقوں امن 2025 اور امن ڈائیلاگ کی بھی تعریف کی۔ انہوں نے خطے میں امن و استحکام کیلیے پاک افواج کے کردار کی تعریف کی۔
27 نومبر 2024 کو بیلاروس کے صدر الیگزینڈر لوکاشینکو نے آرمی چیف جنرل عاصم منیر سے ملاقات کی تھی۔ اس موقع پر دونوں شخصیات نے باہمی دلچسپی کے امور، دفاعی تعاون کے امکانات اور علاقائی سلامتی کی صورتحال پر تبادلہ خیال کیا تھا۔
شپہ سالار نے عالمی اور علاقائی امور میں بیلا روس کے کردار کو سراہا تھا اور باہمی تعاون اور دونوں ممالک کے تعلقات کو مزید وسعت دینے کے عزم کا اظہار کیا تھا۔
بیلاروس کے صدر لوکاشینکو نے دہشتگردی کے خلاف جنگ میں مسلح افواج کی قربانیوں کا اعتراف کرتے ہوئے مسلح افواج کے اہم کردار کو سراہا تھا۔
