اسلام آباد: وزیراعظم شہباز شریف تین روزہ سرکاری دورے پر کل متحدہ عرب امارات(یو اے ای) جائیں گے۔
ترجمان دفتر خارجہ کی جانب سے جاری کردہ بیان کے مطابق نائب وزیراعظم اسحاق ڈار اور کابینہ کے دیگر ارکان سمیت اعلیٰ سطح کا وفد بھی وزیراعظم کے ساتھ روانہ ہوگا۔
ترجمان دفتر خارجہ کا کہنا ہے وزیراعظم ورلڈ گورنمنٹس سمٹ میں شرکت کریں گے، اس کا موضوع گورننس، اختراعات اور بین الاقوامی اشتراک کار ہیں، سمٹ میں دنیا بھر سے سربراہان حکومت اور مملکت شرکت کریں گے۔
ترجمان دفتر خارجہ کے مطابق پالیسی ساز اور بڑی کاروباری شخصیات بھی اجلاس میں شریک ہوں گی، وزیراعظم کی متحدہ عرب امارات کی قیادت سےملاقاتیں بھی ہوں گی اور وہ دیگر ملکوں کے سربراہان سے بھی ملیں گے۔
ترجمان دفتر خارجہ کے مطابق وزیر اعظم شہباز شریف اس دورے پر ملٹی نیشنل کمپنیز کے سربراہان سے بھی ملاقات کریں گے۔
