گوئٹے مالا میں مسافر بردار بس ایک گہری کھائی میں جا گری جو ان کیلیے موت کا کنواں ثابت ہوئی۔ حادثے میں 51 افراد جان سے گئے۔
غیر ملکی خبر رساں ادارے کی رپورٹ کے مطابق گوئٹے مالا میں ایک مسافر بس گہری کھائی میں جا گری، جس کے نتیجے میں اکیاون افراد ہلاک ہوگئے جبکہ 10 مسافروں کی حالت تشویشناک ہے۔
اس حوالے سے متعلقہ حکام نے بتایا کہ مسافر بس سان آگسٹن شہر سے دارالحکومت گوئٹے مالا سٹی جارہی تھی۔
تیز رفتاری کے باعث بس ڈرائیورسے بےقابو ہوگئی اور ریلنگ توڑتی ہوئی پل سے 66 فٹ نیچے گہرے نالے میں گرگئی۔
درجنوں مسافروں کی ہلاکت پر گوئٹے مالا کے صدر برنارڈو اریوالو نے تین دن کے قومی سوگ کا اعلان کیا ہے۔
فائر ڈپارٹمنٹ کی جانب سے سوشل میڈیا پر شیئر کی گئی تصاویر میں بس کو گندے پانی میں ڈوبا ہوا دکھایا گیا ہے، جس کے ارد گرد مسافروں کی لاشیں بکھری ہوئی ہیں۔
ہلاک ہونے والوں کی لاشوں اور زخمی ہونے والے مسافروں کو طبی امداد کیلیے اسپتال منتقل کیا گیا جہاں 51 اموات کی تصدیق کردی گئی۔
رپورٹ کے مطابق اب تک 36مردوں اور15 خواتین کی لاشیں نکالی جاچکی ہیں، بس میں 70سے زیادہ مسافرسوار تھے۔ بہت سے مسافر گندے نالے کی کیچڑ میں پھنس کر رہ گئے جنہیں کافی تگو دو کے بعد نکالا گیا۔
پولیس کا کہنا ہے کہ حادثے کی تفتیش ابھی ابتدائی مراحل میں ہے، مکمل تفتیش کے بعد ہی حادثے کی اصل وجہ کے بارے میں کچھ کہا جا سکتا ہے، مزید تحقیات جاری ہیں۔
