تھائی لینڈ کی ایک بھینس دنیا کی سب سے بڑی بھینس قرار پائی ہے کنگ کانگ نامی اس بھینس کا نام عالمی ریکارڈ بک میں درج کر لیا گیا ہے۔
تھائی لینڈ کے ایک فارم میں پالی جانے والی تین سالہ بھینس کو دنیا کی سب سے بڑی بھینس قرار دے دیا گیا ہے۔ جسامت کی مناسبت سے مالک نے اس کا نام بھی کنگ کانگ رکھا ہوا ہے۔
کنگ کانگ نامی بھینس کی عمر 3 سال ہے اور اس وقت اس کا قد عام قد وقامت کے انسان سے بھی کہیں زیادہ 6 فٹ اور 8 انچ ہے۔
گنیز بُک آف ورلڈ ریکارڈ نے کنگ کانگ کا نام دنیا کی سب سے بڑی بھینس کے طور پر درج کر لیا ہے اور انتظامیہ کا کہنا ہے کہ یہ دیگر پانی کی بھینسوں سے اوسطاً 20 انچ بڑی ہے۔
بھینس کی مالک سچارٹ بونچارون نے بتایا کہ پیدائش کے وقت ہی اس بھینس کا سائز عام بھینس کے بچے کے مقابلے میں غیر معمولی بڑا تھا اور اسی وجہ سے اس کا نام کنگ کانگ رکھا گیا۔
فارم کی ملازمہ چیرپٹ ووتی نے بتایا کہ عام لوگ اس کا قد دیکھ کر خوفزدہ ہوتے ہیں، لیکن یہ اس کے برعکس کافی دوستانہ اور چنچل مزاج کی ہے۔
اس بھینس کی خصوصیات میں یہ ہے کہ یہ چنچل مزاج رکھتی ہے، اس کو کھیلنا پسند ہے، کھجلی کروانا اور لوگوں کے ساتھ بھاگنا بھی اس کے پسندیدہ مشاغل میں شامل ہے۔
