ڈی آئی جی ٹریفک لاہور نے شہریوں کو خبردار کرتے ہوئے کہا ہے کہ ٹریفک قوانین کی خلاف ورزی کرنے والوں کو جیل بھجوایا جائے گا۔
تفصیلات کے مطابق ڈی آئی جی ٹریفک لاہور اطہر وحید کا کہنا تھا کہ لاہور کی سڑکیں بند کرنے والوں پر بھی مقدمات درج ہونگے، ڈی آئی جی نے ایسے لوگوں کو انتباہ دیتے ہوئے کہا کہ لاہور کی سڑک جو بند کرےگا اسے خود گرفتار کرنے آؤں گا۔
ڈی آئی جی ٹریفک نے کہا کہ 2 سے 4 ماہ کے اندر لاہور کی سڑکوں کو بدل دیں گے، چھوٹی چھوٹی باتوں پر سڑکیں بند کرنے والوں کو سوچنا چاہیے تھا کیوں راستہ بند کیا۔
ٹریفک قوانین کی خلاف ورزی ، موٹر سائیکل سوار پر 1 لاکھ 54ہزار روپے جرمانہ عائد
دریں اثنا لاہور میں ایس ایچ اوز سمیت 3 پولیس اہلکاروں کیخلاف کرپشن کے 2 مقدمات درج کیے گئے ہیں، سابق ایس ایچ او ڈیفنس سجاد نے ملزمان سے 17لاکھ 75 ہزاررشوت لی تھی۔
ایف آئی آر کے متن میں بتایا گیا کہ ایس ایچ او نے منشیات فروشی کے الزام میں گرفتار 3 ملزمان کو رشوت لےکر چھوڑا، تھانہ فیصل ٹاؤن کے سابق ایس ایچ او سلیمان اکبر اور کانسٹیبل مقبول شاکر کیخلاف مقدمہ درج کیا گیا۔
