سیکیورٹی فورسز کی خیبرپختونخوا میں 2 مختلف کارروائیوں میں 15 خارجی مارے گئے اور 4 جوان شہید ہوگئے۔
پاک فوج کے شعبہ تعلقات عامہ (آئی ایس پی آر) کے مطابق سیکیورٹی فورسز نے ڈی آئی خان کے علاقے ہتھلا میں انٹیلی جنس بیسڈ آپریشن کیا جس کے نتیجے میں 9 خارجی مارے گئے۔
ہلاک خارجیوں میں فرمان عرف ثاقب، امان اللہ عرف طوری، سعید عرف لیاقت اور بلال شامل ہیں۔
ترجمان پاک فوج کا بتانا ہے کہ ہلاک خارجی قانون نافذ کرنے والے اداروں کو انتہائی مطلوب تھے۔
سیکیورٹی فورسز نے دوسری کارروائی شمالی وزیرستان کے علاقے میرانشاہ میں کی جس کے نتیجے میں 6 خارجی ہلاک ہوگئے۔
فائرنگ کے شدید تبادلے میں لیفٹیننٹ محمد حسن اشرف تین ساتھیوں سمیت شہید ہوگئے، شہدا میں نائب صوبیدار محمد بلال، سپاہی فرحت اللہ اور سپاہی ہمت خان شامل ہیں۔
آئی ایس پی آر کا کہنا ہے کہ سیکیورٹی فورسز کا ممکنہ خارجیوں کے خاتمے کے لیے کلیئرنس آپریشن جاری ہے، سیکیورٹی فورسز دہشت گردی کے خاتمے کے لیے پرعزم ہیں۔
ترجمان پاک فوج کا کہنا ہے کہ بہادر جوانوں کی قربانیاں ہمارے عزم کو مزید تقویت دیتی ہیں۔
