اسلام آباد: نیب کے سینئر افسر وقاص احمد کی پراسرار موت کا معمہ پوسٹ مارٹم میں بھی حل نہ ہو سکا، حکام نے اب فرانزک ٹیسٹ کرانے کا فیصلہ کر لیا ہے۔
ذرائع کے مطابق پوسٹ مارٹم میں گریڈ 19 کے نیب افسر وقاص احمد کی موت کی وجہ کا تعین نہ ہو سکا، ان کا پوسٹ مارٹم پولی کلینک میں ہوا تھا، اب نیب افسر کی موت کی وجہ جاننے کے لیے فرانزک ٹیسٹ کرایا جائے گا، جس سے نیب افسر کی موت کی وجہ معلوم ہو سکے گی۔
وقاص احمد کا ٹیسٹ پنجاب فرانزک سائنس ایجنسی لاہور سے کرایا جائے گا، اور رپورٹ رواں ماہ موصول ہونے کا امکان ہے، فرانزک ٹیسٹ کے لیے وقاص احمد کے اعضا کے سیمپلز بھجوا دیے گئے ہیں جو پولیس کے حوالے کیے گئے تھے۔
فرانزک ٹیسٹ کے لیے دل، جگر، گردہ، تلی کے سیمپلز لیے گئے ہیں، وقاص احمد کی سانس کی نالی اور معدہ سے بھی سیمپل لیا گیا ہے، فرانزک ٹیسٹ سے وقاص احمد کے جسم میں زہریلے، نشہ آور اجزا کی جانچ ہوگی۔
نیب افسر کی اسلام آباد کے گیسٹ ہاؤس سے لاش برآمد
یاد رہے کہ نیب افسر کی لاش 23 فروری کو اسلام آباد کے گیسٹ ہاؤس سے ملی تھی، وقاص احمد کے بازوں، ٹانگوں پر سرنجز کے متعدد نشانات موجود تھے، پولی کلینک منتقلی کے وقت وقاص احمد کی دائیں ٹانگ میں کینولا لگا تھا، اور اس کینولا میں سرنج لگی ہوئی تھی، وقاص احمد کے کمرے سے استعمال شدہ متعدد انجکشنز بھی ملے تھے۔
