مگرمچھ ایسا جانور ہے جس کا نام سن کر ہی لوگوں پر کپکپی طاری ہونے لگتی ہے اگر وہ ایک گھر کے کچن میں گھس آئے تو کیا حال ہو؟
مگرمچھ کا شمار ان جانداروں میں ہوتا ہے جو خشکی اور تری دونوں جگہوں پر رہتے ہیں۔ اپنی شکار کی فطرت کے باعث ہر انسان اس سے خوف کھاتا ہے۔
آج سے قبل آپ نے سڑکوں، گلیوں یا نالوں میں مگرمچھ نکلتے دیکھیں ہوں گے۔ مگر ایک مگرمچھ گھر کے کچن میں داخل ہوگیا جس سے اہل خانہ میں خوف پھیل گیا۔
یہ واقعہ امریکی ریاست فلوریڈا کے علاقے فورٹ مائرز کا ہے جہاں طویل قامت مگرمچھ گھر کے کچن میں گھس گیا۔
رپورٹ کے مطابق پال کوئن نامی ایک شخص نے اپنے گھر کا دروازہ تازہ ہوا کے لیے کھلا چھوڑا اور خود اپنی ای میل چیک کرنے میں مصروف ہوگیا۔
اسی اثنا میں اس نے گھر میں کچن کی طرف کچھ مشکوک آوازیں سنائی دیں جب نوجوان نے وہاں جاکر دیکھا تو حیران ہونے کے ساتھ خوفزدہ ہوگیا کہ اس کے کچن میں 8 فٹ طویل ایک مگر مچھ موجود تھا۔
یہ مگرمچھ گھر کا کھلا دروازہ دیکھ کر مٹر گشت کرتا ہوا گھر میں داخل ہوا تھا۔
پال کوئن نے فوری طور 911 پر کال کی اور اس طویل مگرمچھ کو پکڑنے کے لیے فش اینڈ وائلڈ لائف کنزرویشن کمیشن ٹریپر کو مدد کے لیے طلب کیا۔
عملے نے آکر طویل جستجو کے بعد مگرمچھ کو قابو کیا اور کیچ پول کی مدد سے گھر سے باہر گھسیٹتے ہوئے لے گئے۔ اس دوران مگرمچھ کو خود کو چھڑانے کے لیے سخت جدوجہد کرتے دیکھا جا سکتا ہے۔
