کراچی : عزیز آباد بلاک 2 میں ایک ہی دن میں 4 موٹرسائیکلوں کی بیٹریاں چوری ہوگئیں ، بیٹری چورکی متعددوارداتوں کی سی سی ٹی وی فوٹیج منظرعام پرآگئی۔
تفصیلات کے مطابق کراچی کے علاقے عزیز آباد بلاک 2 میں موٹر سائیکل سے بیٹری چوری کی وارداتیں عروج پر ہیں، ایک ہی دن میں 4 موٹرسائیکلوں کی بیٹریاں چوری کی گئیں۔
بیٹری چور کی متعدد وارداتوں کی سی سی ٹی وی فوٹیج منظرعام پرآگئی ، جس میں دیکھا جاسکتا ہے کہ ملزم ایک ہی گلی سے متعدد موٹرسائیکلوں کی بیٹریز نکال چکا ہے جبکہ 2 موٹر سائیکلوں کےبیٹری کور کھولنے میں ناکام رہا۔
فوٹیج میں ملزمان کا چہرہ واضح طور دیکھا جاسکتا ہے ، علاقہ مکینوں کا کہنا ہے کہ علاقےمیں گیس کے میٹر بھی چوری ہوچکےہیں۔
یاد رہے چند روز قبل کراچی کے علاقے عزیزآباد بلاک 8 میں موٹرسائیکل چوری کی واردات ہوئی تھی، فوٹیج میں دیکھا جاسکتا تھا موٹرسائیکل لفٹرز نے پہلے ایک چکر لگایا پھر واپس آئے، ایک ملزم نے اتر کر گلی کا جائزہ لیا پھر ہدف کی جانب گیا۔
ملزمان اپنی موٹر سائیکل میں چوری کے اوزار ساتھ لائے تھے، ملزمان نے پارکنگ میں کھڑی ایک موٹرسائیکل کھولنے کی کوشش کی تاہم کوشش پر ناکامی ہوئی تو دوسری موٹرسائیکل کی طرف گیا اندر کھڑی موٹرسائیکل پر چابی لگائی تو کامیاب ہوگئے تھے۔
