مسجد الحرام میں زائرین کی آمد کا ریکارڈ رکھنے کے لیے داخلی دروازوں پر اسمارٹ اسکینرز لگا دیے گئے ہیں۔
مکہ مکرمہ میں واقع مسجد الحرام دنیا میں مسلمانوں کا سب سے مقدس مقام ہے جہاں ہر سال کروڑوں زائرین حج وعمرہ کی سعادت حاصل کرنے آتے ہیں۔
سعودی حکومت زائرین کو سہولتوں کی فراہمی کے لیے اقدامات کرتی رہتی ہے اور اب مسجد الحرام میں آنے والے زائرین کی آمد کا ریکارڈ رکھنے کے لیے مسجد کے داخلی دروازوں پر اسمارٹ اسکینرز نصب کر دیے گئے ہیں۔
سبق نیوز کے مطابق حرمین شریفین کے امور کے نگراں ادارے کی جانب سے یہ قدم مسجد الحرام میں آنے والوں کی تعداد کا درست ریکارڈ رکھنے کے لیے اٹھایا گیا ہے۔
رپورٹ کے مطابق حساس اور جدید ترین سسٹم کے اسکینرز مسجد کے دروازوں کے اوپر اور دہلیز کے نیچے نصب کیے گئے ہیں۔ جیسے ہی کوئی شخص مسجد الحرام میں داخل ہونے کے لیے دہلیز کو عبور کرتا ہے حساس سکینر فوری طورپر انسانی حرکت کو ریکارڈ کر لیتے ہیں۔
ان جدید اسکینرز سے حاصل ہونے والا ڈیٹا مرکزی کنٹرول روم کو خود کار طریقے سے ارسال کیا جاتا ہے جہاں سے مسجد الحرام میں داخل ہونے والوں کی تعداد کو فوری ریکارڈ کر لیا جاتا ہے۔
ان اسکینرز کا یہ فائدہ ہے کہ زائرین کی تعداد کو ریکارڈ کرنے کے علاوہ جہاں لوگوں کی تعداد زیادہ ہوتی ہے اس مقام پر موجود اہلکاروں کو ہدایت کی جاتی ہے کہ افراد کی تعداد مقررہ حد تک پہنچ چکی ہے۔ جس کے بعد زائرین کو متبادل دروازوں کی جانب بھیجا جاتا ہے جس سے لوگوں کے رش کو کنٹرول کرنے میں بھی مدد ملتی ہے۔
