اسلام آباد : نجی میڈیکل کالجز کی فیسوں کے حوالے سے طلبا کے لیے بڑی خبر آگئی ، میڈیکل کالجز سالانہ 35 لاکھ روپے تک فیس وصول کر رہے ہیں۔
تفصیلات کے مطابق حکومت نے نجی میڈیکل کالجز کی فیسوں کی حد بندی کا فیصلہ کرلیا، ذرائع نے بتایا کہ نجی میڈیکل و ڈینٹل کالجز فیس کی بالائی حد مقرر کی جائے گی۔
ذرائع کا کہنا تھا کہ میڈیکل کالجز فیس کی بالائی حد کیلئے مختلف آپشنز زیرغور ہیں، موجودہ فیسوں سے کم پر حد بندی ہو گی۔
میڈیکل فیس پر کیپ کا مقصد من مانے اضافوں پر قابو پانا ہے،نجی میڈیکل کالجز فیس کیپ کے حوالے سے مشاورت مکمل ہو چکی ہے، کالجز سالانہ 35 لاکھ روپے تک فیس وصول کر رہے ہیں۔
مزید پڑھیں : میڈیکل و ڈینٹل کالجز کی رجسٹریشن پر پابندی لگانے کا فیصلہ
گذشتہ روز پاکستان میڈیکل اینڈ ڈینٹل کونسل (پی ایم ڈی سی) نے کالجز رجسٹریشن پر پابندی کے فیصلے کی منظوری دی تھی ، جس کے تحت پی ایم ڈی سی نئے میڈیکل و ڈینٹل کالجز کی رجسٹریشن نہیں کرے گی۔
ذرائع کا کہنا تھا کہ 5 جنوری کے بعد کی میڈیکل کالجز رجسٹریشن کی درخواستوں پر غور نہیں ہو گا جبکہ 5 جنوری سے قبل کی 13 میڈیکل کالجز کی درخواستیں زیر غور آئیں گی۔
میڈیکل کالجز کیلئے فیکلٹی کی کمی پر رجسٹریشن پر پابندی کا فیصلہ ہوا، ملک بھر میں میڈیکل و ڈینٹل کالجز کی تعداد 187 ہے، ملک میں نجی میڈیکل و ڈینٹل کالجز 121 اور سرکاری 66 ہیں۔
