سعودی عرب میں مقدس شہر مکہ مکرمہ میں دوران رمضان المبارک عمرہ زائرین کی نگرانی کے لیے 200 اسمارٹ اسکرینوں کو نصب کردیا گیا۔
سعودی خبر رساں ادارے کی رپورٹ کے مطابق رمضان المبارک کے دوران عمرہ زائرین کی بڑھتی ہوئی تعداد کو مد نظر رکھتے ہوئے سیکیورٹی انتظامات کو مزید سخت کردیا گیا ہے۔
مکہ مکرمہ کے مرکزی کنٹرول سینٹر میں اس سلسلے میں 200 سے زائد اسمارٹ اسکرینز نصب کی گئی ہیں، جو شہر میں جاری آپریشنز کی براہِ راست نگرانی اور انتظام میں مدد فراہم کریں گی۔
یہ نظام زائرین کی آمد، نقل و حرکت اور روانگی کو یقینی بنانے کے لیے ترتیب دیا گیا ہے، تاکہ زیادہ رش کے بہاؤ کو محفوظ رکھنے میں مدد مل سکے اور کسی بھی ہنگامی صورتحال سے نمٹا جاسکے۔
7 مخصوص شعبوں میں سیکیورٹی کے مختلف امور کو تقسیم کردیا گیا ہے، جس کی بدولت پورے شہر میں سیکیورٹی انتظامات کو مربوط انداز میں چلایا جا سکتا ہے اور تمام ترقیاتی مراحل کو براہ راست مانیٹرکیا جاسکتا ہے۔
رپورٹس کے مطابق یہ جدید مرکز 24 گھنٹے فعال رہتا ہے اور رمضان المبارک کے دوران سیکیورٹی انفراسٹرکچر کا ایک اہم حصہ ہے۔
اس کے ذریعے زائرین کے بہاؤ کو ٹریک بھی کرسکتے ہیں، ہجوم کی گنجائش کو مانیٹر کیا جاسکتا ہے، اور کسی بھی ممکنہ واقعے پر فوری ردعمل دیا جاسکتا ہے۔
اس کے علاوہ سعودی عرب میں حج اور عمرے کی خصوصی عبادت کے لیے آنے والوں کو ہنگامی طبی امداد کی فراہمی کے لیے اسکوٹر سروس کا آغاز کردیا گیا ہے۔
رپورٹ کے مطابق مملکت میں عمرہ اور حج کے لیے آنے والوں کے لیے خصوصی انتظامات کا اعلان کیا گیا ہے۔
مسجد نبوی ﷺ میں پاکستانی عمرہ زائر کی جان بچا لی گئی
ہنگامی طبی امداد کے لیے اب اسکوٹر سروس کا مدینہ منورہ میں بھی آغاز کردیا گیا ہے۔
رپورٹس کے مطابق اسکوٹر سواروں پر مشتمل یہ عملہ عمرہ اور حج ادا کرنے والوں کو ہنگامی طبی امداد مہیا کرے گا، اب تک 91 افراد کو ان ٹیموں نے رش والے مقامات سے اسپتال منتقل کیا ہے۔
