ممبئی : بالی وڈ فلم انڈسٹری کے معروف اور لیجنڈ اداکاروں امیتابھ بچن، راجیش کھنہ اور شتروگھن سنہا نے ماضی کی مایہ ناز اور سُپرہٹ فلمیں کرنے سے کیوں انکار کیا تھا؟
یہ بھارتی فلموں کے وہ چمکتے ستارے ہیں جنہوں نے نامور فلم ساز منوج کمار کی کئی سُپرہٹ فلمیں ٹھکرا دی تھیں، جن فلموں نے باکس آفس پر کئی ریکارڈ توڑے۔
بھارتی میڈیا رپورٹ کے مطابق منوج کمار عرف بھارت کمار اپنے دور کے نہ صرف ایک مشہور اداکار تھے بلکہ ایک باکمال فلم ساز بھی تھے۔ تاہم، حیرت کی بات یہ ہے کہ کئی بڑے فلمی ستاروں نے ان کی سُپرہٹ فلموں میں کام کرنے سے انکار کر دیا تھا۔
فلم اُپکار : راجیش کھنہ
رپورٹ کے مطابق پُورَن کمار کا کردار دراصل پرَیم چوپڑا کے لیے نہیں تھا بلکہ اس کیلئے منوج کمار کی پہلی پسند راجیش کھنہ تھے، لیکن تاریخوں کی مصروفیات کے باعث راجیش کھنہ نے بھارت کمار کی بلاک بسٹر فلم میں کام کرنے سے معذرت کرلی تھی۔
فلم شور : شتروگھن سنہا
اطلاعات کے مطابق، مشہور اداکار شتروگھن سنہا کو فلم میں ایک معاون مرکزی کردار کی پیشکش کی گئی تھی، لیکن وہ منوج کمار کو ایک ساتھ زیادہ تاریخیں نہیں دے سکے، لہٰذا انہوں نے فلم چھوڑ دی اور ان کی جگہ پریم ناتھ کو کاسٹ کیا گیا۔
فلم شور : پران
کہا جاتا ہے کہ منوج کمار اپنے پسندیدہ اداکار کو ایک پٹھان کے کردار میں لینا چاہتے تھے، لیکن پران اُس وقت فلم "زنجیر” میں پہلے ہی پٹھان کا کردار نبھا رہے تھے اور وہ ایک ہی جیسے کردار دو فلموں میں کرنا نہیں چاہتے تھے، اس لیے انہوں نے یہ کردار ٹھکرا دیا تھا۔
فلم روٹی کپڑا اور مکان : شرمیلا ٹیگور
بھارتی میڈیا کے مطابق شرمیلا ٹیگور کو فلم میں زینت امان کا کردار آفر ہوا تھا، لیکن وہ موسمی چٹرجی والا کردار ادا کرنا چاہتی تھیں۔ منوج کمار نے اپنی تخلیقی سوچ پر قائم رہتے ہوئے فلم کی کاسٹ میں کوئی تبدیلی نہیں کی، جس کی وجہ سے شرمیلا نے فلم چھوڑ دی تھی۔
فلم روٹی کپڑا اور مکان : سمیتا پاٹیل
رپورٹس کے مطابق، منوج کمار نے اپنی فلم کے ذریعے اداکارہ سمیتا پاٹیل کو متعارف کرنے کا ارادہ کیا تھا۔ تاہم، سمیتا نے فلم کا حصہ بننے سے انکار کر دیا کیونکہ وہ کثیر کرداروں پر مبنی فلم (ensemble drama) میں کام کرنے سے غیر مطمئن تھیں۔ بعد میں یہ کردار زینت امان کو دے دیا گیا۔
فلم کرانتی : امیتابھ بچن
منوج کمار دراصل شتروگھن سنہا والے کردار کے لیے امیتابھ بچن کو لینا چاہتے تھے، لیکن اطلاعات کے مطابق "بگ بی” نے یہ فلم ٹھکرا دی، اور یوں شتروگھن سنہا کو اس فلم میں شامل کیا گیا۔
