اسلام آباد : وزیراعظم شہباز شریف نے ٹرمپ انتظامیہ کے ساتھ ملکر کام کرنےکی خواہش کا اظہار کردیا اور دونوں ممالک میں تجارت،سرمایہ کاری میں تعاون کے فروغ پر زور دیا۔
تفصیلات کے مطابق وزیراعظم شہباز شریف کی پاکستان منرلزانویسمنٹ فورم میں شرکت کیلئے پاکستان کے دورے پر آئے امریکی وفد سے ملاقات ہوئی ، وفدمیں ایرک میئر، سینئر بیورو آفیشل اورقائم مقام اسسٹنٹ سیکرٹری شامل تھے جبکہ بیورو آف ساؤتھ اینڈ سینٹرل ایشین افیئرز بھی وفد کا حصہ تھا۔
وزیراعظم شہبازشریف نے فورم میں امریکی شرکت کا خیرمقدم کرتے ہوئے کہا کہ پاکستان کےمعدنیات کےشعبےمیں وسیع مواقع موجودہیں، امریکی کمپنیوں کوسرمایہ کاری کےمواقع سے مستفید ہونا چاہیے۔
وزیراعظم نے ٹرمپ اور انتظامیہ سے ملکر کام کرنے کی خواہش کا اظہار کرتے ہوئے دونوں ممالک میں تجارت،سرمایہ کاری میں تعاون کے فروغ سمیت انسداد دہشت گردی اور باہمی دلچسپی کے شعبوں میں تعاون بڑھانے کی اہمیت پر زور دیا۔
قائم مقام اسسٹنٹ سیکرٹری نے فورم کے کامیاب انعقاد پر پاکستان کو مبارکباد دیتے ہوئے معدنیات کےشعبےمیں وسیع مواقع کا اعتراف کیا۔
ملاقات میں امریکی کمپنیوں کی جانب سے اس شعبےمیں سرمایہ کاری میں دلچسپی سے آگاہ کیا اور مشترکہ دلچسپی کے امور پر پاکستان سے ملکر کام کرنے کی امریکی خواہش کا بھی اظہار کیا گیا۔
قائم مقام اسسٹنٹ سیکرٹری کا کہنا تھا کہ امریکا پاکستان سے دو طرفہ تعلقات کے مزید فروغ کا خواہاں ہے۔
ملاقات میں نائب وزیراعظم و وزیر خارجہ محمد اسحاق ڈار ، وفاقی وزیر برائے اقتصادی امور احد خان چیمہ سمیت دیگر وزرا اور متعلقہ حکام بھی موجود تھے۔
