کراچی میں شارع فیصل پر تیزرفتار ڈمپر چلانے والے ڈرائیور نے گرفتاری دیدی۔

ڈی آئی جی ٹریفک پیر محمد شاہ کے مطابق ڈمپرز ایسوسی ایشنز کی جانب سے ڈرائیور کی حوالگی میں تعاون کیا گیا، ڈرائیور کیخلاف مقدمہ درج کر کے قانونی کارروائی کی جائےگی۔

پیرمحمدشاہ نے بتایا کہ ڈمپر کو بھی تحویل میں لےکر تھانےمنتقل کیا جا رہا ہے۔

اس سے قبل انہوں نے کہا تھا کہ ڈمپر ایسوسی ایشن کی وعدہ خلافی پر ٹریفک پولیس کا رات بھر آپریشن جاری رہا جس میں 27 ڈمپرز تحویل میں لے لیے اور 142کیخلاف جرمانے کیے گئے۔

انہوں نے کہا کہ شارع فیصل پر تیز رفتار ڈمپر کی ویڈیو وائرل ہوئی تھی، پیٹرولنگ افسر نے ڈمپر روکنے کی کوشش کی لیکن ڈرائیور فرار ہو گیا تھا اس واقعے پر تمام ڈمپرایسوسی ایشنز کو فوری ہدایت کی گئی اور ان سے کہا گیا ڈمپر اور ڈرائیور دونوں پولیس کےحوالےکریں۔

ڈی آئی جی ٹریفک نے بتایا کہ ڈمپر ایسوسی ایشن کے صدر لیاقت محسود اور دیگر نے پہلے وقت مانگا پھر لیاقت محسود سمیت دیگر بعد میں اپنے وعدے سے پیچھے ہٹ گئے۔

ان کا کہنا تھا کہ گزشتہ رات وسیع پیمانے پر کریک ڈاؤن شروع کیا گیا اور یہ کارروائیاں ڈمپرڈرائیور کی گرفتاری تک جاری رہیں گی کیونکہ کوئی بھی قانون سےبالا نہیں ہے۔