پنجاب حکومت نے فلم انڈسٹری کو پروموٹ کرنے سے متعلق بڑا فیصلہ کرلیا۔
وزیر اعلیٰ پنجاب مریم نواز نے 2 ارب روپے کی گرانٹ تقسیم کرنے کی منظوری دے دی، مقبول ترین فلمیں بنانے والے فلمسازوں اور ہدایت کاروں کو رقم مل سکے گی۔
ذرائع کے مطابق وزیراعلیٰ پنجاب مریم نواز نے فلم فنڈز ڈسٹری بیوشن کمیٹی تشکیل دی ہے جس کی سربراہ صوبائی وزیر مریم اورنگزیب ہوں گی۔
کمیٹی میں وزیر اطلاعات عظمیٰ بخاری، صوبائی وزیر خزانہ مجتبیٰ شجاع الرحمان شامل ہوں گے۔
کمیٹی میں سیکریٹری اطلاعات، سیکریٹری پی اینڈ ڈی، سیکریٹری خزانہ بھی شامل ہوں گے، فنڈز ان ہدایت کاروں، فلم سازوں کو ملیں گے جنہوں نے پانچ سالوں میں کم از کم ایک فلم بنائی ہو۔
ذرائع کا بتانا ہے کہ فنڈز کے لیے ضروری ہوگا کہ فلم کا اسکرپٹ اور کاسٹ سے متعلق تفصیلات بتائی جائیں۔
