وفاقی دارالحکومت اسلام آباد میں آج جماعت اسلامی کی جانب سے غزہ مارچ کا اہتمام کیا گیا ہے، اس سلسلے میں انتظامیہ نے ریڈ زون سیل کر دیا۔
اے آر وائی نیوز کی رپورٹ کے مطابق جماعت اسلامی کی جانب سے آج اسلام آباد میں غزہ مارچ ہوگا، اس حوالے سے ذرائع کا کہنا ہے کہ انتظامیہ نے ریڈ زون اور توسیع شدہ ریڈ زون سیل کر دیا ہے۔
ذرائع کا کہنا ہے کہ وفاقی حکومت نے مارچ کے شرکاء سے سختی سے نمٹنے کا فیصلہ کیا ہے، احتجاج کرنے یا لوگوں کو اُکسانے والوں کو فوری گرفتار کرنے کا فیصلہ کیا گیا ہے۔
View this post on Instagram
ذرائع کے مطابق گرفتار کیے جانے والے مظاہرین کیخلاف پیس فل اسمبلی اور پبلک ایکٹ کے تحت مقدمات درج کیے جائیں گے۔
ذرائع کا مزید کہنا ہے کہ اس سلسلے میں ریڈ زون میں اضافی نفری بھی تعینات کر دی گئی ہے، جبکہ دیگر صوبوں سے پولیس کی اضافی نفری بھی منگوا لی گئی ہے۔
جماعت اسلامی نے اسرائیل کی جانب سے مظلوم فلسطینیوں وحشیانہ بربریت اور قتل عام کیخلاف 20 اپریل کو اسلام آباد میں غزہ مارچ کا اعلان کیا تھا۔
منصورہ لاہور میں پریس کانفرنس کرتے ہوئے حافظ نعیم الرحمان نے کہا تھا کہ غزہ سے اظہار یکجہتی اور اسرائیلی مظالم کے خلاف 26 اپریل کو تاریخی ہڑتال ہوگی۔
ان کا کہنا تھا کہ یہ معاملہ سیاست کا نہیں بلکہ غزہ والوں سے اظہار یکجہتی کا ہے اس لیے پوری قوم یکجا ہو کر ہڑتال کرے گی۔
