ٹھٹہ پولیس نے وزیر مملکت کھئیل داس کوہستانی کی گاڑی پر حملے کا مقدمہ درج کرکے سندھ ترقی پسند پارٹی کے ضلعی صدر جلال شاہ کو گرفتار کرلیا۔
اے آر وائی نیوز کی رپورٹ کے مطابق جلال شاہ کو رات گئے پولیس نے گھر پر چھاپہ مار کر حراست میں لیا، کھئیل داس پر حملہ کے مقدمہ میں قوم پرست تنظیم کے عہدیدار سمیت 8کارکنان کو نامزد کیا گیا ہے۔
پولیس کے مطابق مذکورہ مقدمہ میں جلال شاہ، حیدر شورو، حکیم بروہی، جاوید جانوری اور دیگر چار افراد نامزد کیے گئے ہیں۔
ٹھٹھہ میں گزشتہ روز وزیر مملکت کھیئل داس کی گاڑی پر حملہ کیا گیا تھا، سندھ ترقی پسند پارٹی (ایس ٹی پی) کے کارکنوں نے انڈوں اور ٹماٹر سے ان کی گاڑی پر حملہ کیا۔
قبل ازیں ترجمان ن لیگ کے مطابق وزیر مملکت کھیئل داس کوہستانی کی گاڑی پر ٹھٹھہ کے قریب حملہ کیا گیا تھا وہ کراچی واپس آرہے تھے کہ راستے میں قوم پرست تنظیم کے کارکنان نے گاڑی پر ڈنڈے مارے، اور انڈے پھینکے۔
مزید پڑھیں : ٹھٹھہ میں وزیر مملکت کھیئل داس کوہستانی کی گاڑی پر حملہ
پولیس نے بروقت کارروائی کرکے حملہ آوروں کو بھگا دیا تھا، ان کی گاڑی پر حملہ پریس کلب کے پاس کیا گیا، تاہم وہ حملے میں محفوظ رہے۔
وزیر مملکت کھیئل داس کوہستانی مقامی رہنماؤں سے ملاقات کے بعد جھوک شریف جارہے تھے جبکہ قوم پرست تنظیم کے کارکن پریس کلب پر کینالوں کے خلاف احتجاج کررہے تھے۔
