اے این ایف پورٹ کنٹرول یونٹ نے کراچی گیٹ وے ٹرمنل پر بروسٹ مصالحوں کے پیکٹ میں مہلک ترین نشہ میٹھ فیٹامائن آئس نشہ اسمگل کرنے کی کوشش ناکام بنادی۔
تفصیلات کے مطابق اے این ایف پورٹ کنٹرول یونٹ نے خفیہ اطلاع پر کارروائی کرتے ہوئے کنٹینر کے ذریعے دو ارب سے زائد مالیت کا مہلک ترین نشہ آئس دبئی پورٹ پر اسمگل کرنے کی کوشش ناکام بنادی۔
ترجمان اے این ایف کے مطابق کارروائی کے دوران 200 کلو آئس ڈرگ برآمد ہوئی جس کی مالیت بین الاقوامی مارکیٹ میں 2 ارب روپے سے زائد مالیت کی ہے جسے کراچی گیٹ وے ٹرمنل سے دبئی جبل علی اسمگل کیا جارہا تھا۔
ترجمان کا کہنا ہے کہ پورٹ کنٹرول یونٹ ٹیم نے خفیہ اطلاع ملنے پر دبئی کے لیے بک کیے گئے کنٹینر کی تلاشی لی تو کنٹینر میں بروسٹ مصالحے کے 2 ہزار پیکٹس موجود تھے جن میں مہارت سے آئس کے پیکٹس کو چھپایا گیا تھا۔
ترجمان کے مطابق یہ کنسائنمنٹ الشمس امپورٹ ایکسپورٹ ملتان کی جانب سے بک کروایا گیا تھا، منشیات برآمد کرنے کے بعد ملزمان کی گرفتاری کی کوششیں کی جارہی ہیں۔
