ایف آئی اے گوجرانوالہ زون نے کارروائیاں کرتے ہوئے انسانی سمگلنگ ویزہ فراڈ اور شہریوں کے ڈیٹا میں ٹمپرنگ و ردوبدل میں ملوث نادرا ایجنٹ سمیت 3 ملزمان گرفتار کرلئے۔
ایف آئی اے کا کہنا ہے کہ گرفتار ملزمان کی شناخت اطہر بٹ، زمان اکرم اور رؤف مسیح کے نام سے ہوئی ہے، ملزم اطہر بٹ کو چھاپہ مار کارروائی میں نارووال سے گرفتار کیا گیا۔
ملزم اطہر بٹ شہریوں کے ڈیٹا میں ٹمپرنگ، ردوبدل، فیملی ٹری میں مداخلت اور جعلی شناختی کارڈز کے اجراء میں ملوث پایا گیا ہے، ملزم کو گرفتار کر کے شواہد حاصل کر لیے گئے مذید تفتیش جاری ہے جبکہ ملزم کے ساتھ شامل نادرا آفیشل کے ملوث ہونے کا تعین کیا جا رہا ہے۔
ایف آئی اے کا کہنا ہے کہ ایک اور کارروائی میں ملزم زمان اکرم کو گوجرانوالہ سے گرفتار کیا گیا، ملزم نے شہری کو کینیڈا ملازمت کی غرض سے بھجوانے کے لیے 92 لاکھ روپے سے زائد ہتھیائے۔
ملزم شہری کو بیرون ملک بھجوانے میں ناکام رہا اور رقم وصول کرنے کے بعد روپوش ہو گیا جبکہ ملزم روٴوف مسیح کو چھاپہ مار کارروائی میں نارووال سے گرفتار کیا گیا۔
ایف آئی اے نے کہا کہ ملزم نے شہریوں کو بیرون ملک ملازمت کا جھانسہ دے کر لاکھوں روپے ہتھیائے، ملزم نے شہری کو یو اے ای بھجوانے کے لیے 3 لاکھ روپے وصول کیے، ملزم شہری کو بیرون ملک بھجوانے میں ناکام رہا اور روپوش ہو گیا ملزمان کو گرفتار کر کے تفتیش کا آغاز کر دیا گیا ہے۔
