پاک بھارت کشیدگی کے تناظر میں یو این سیکریٹری جنرل انتونیو گوتریس نے تناؤ میں کمی کے ہر اقدام کی حمایت کا اعلان کیا ہے۔
اقوام متحدہ کے سیکریٹری جنرل انتونیو گوتریس نے پاک بھارت کشیدگی کے تناظر میں اہم نکتہ پیش کرتے ہوئے کہا کہ مشکل ترین مسائل بھی معنی خیز اور مثبت بات چیت سے حل کیے جا سکتے ہیں۔
بر صغیر کے دو پڑوسی ممالک کے درمیان جاری کشیدگی پر اقوام متحدہ کے سیکریٹری جنرل نے اپنے بیان میں کہا ’’ہم کشیدگی میں کمی کے لیے پاکستان اور بھارت کے لیے قابل قبول کسی بھی اقدام کی حمایت کریں گے۔‘‘
انھوں نے کہا ’’ہر اس اقدام کی حمایت کریں گے جس سے پاک بھارت تناؤ میں کمی آئے، اور بات چیت دوبارہ شروع ہو، مشکل ترین مسائل بھی معنی خیز اور مثبت بات چیت سے حل کیے جا سکتے ہیں۔‘‘
پاکستانی مشن کے قونصلر جواد اجمل کا بھارتی مندوب کے بے بنیاد الزامات کا کرارا جواب
انتونیو گوتریس نے فریقین سے اپیل کی کہ کشیدگی کو روکنے کے لیے دونوں ممالک انتہائی تحمل سے کام لیں۔
واضح رہے جموں و کشمیر کے علاقے پہلگام میں سیاحوں پر حملے کے بعد بھارت نے پاکستان کو بے بنیاد الزامات کے نشانے پر رکھا ہوا ہے، پاکستان نے افسوس ناک واقعے میں ملوث ہونے کے الزامات سختی سے مسترد کر دیے ہیں، وزیر اعظم پاکستان شہباز شریف نے تحقیقات میں تعاون کی پیشکش بھی کی ہے۔
تاہم، بھارت کی جانب سے اشتعال انگیزی کرتے ہوئے انڈس واٹر ٹریٹی کی معطلی کا یک طرفہ اور غیر قانونی اعلان کیا گیا، جس کی وجہ سے دونوں ممالک کے درمیان صورت حال مزید کشیدہ ہو گئی۔
